Masallı rayonunun Kalinovka kəndindəki Sehran Hacıyev adına tam orta məktəbdə vaxtı ilə burada  işləmiş, dünyasını dəyişmiş müəllimlərin xatirəsini yad etmək üçün tədbir keçirilib. Tədbiri məktəbin təlim-tərbiyə işləri üzrə direktor müavini, bu işin təşəbbüskarı və təşkilatçısı İttifaq Rzayev açaraq mərhum müəllimlərin şəkillərini əldə edib, onları böyütdüklərini, tərcümeyi-hallarını topladıqlarını, həmin materiallardan ibarət  guşə yaratdıqlarını bildirib. Tədbirdə dünyasını dəyişmiş müəllimlərin yaxınları, ətraf kəndlərin məktəb direktorları, müəllimlər, kənd ictimaiyyətinin nümayəndələri iştirak ediblər. RTŞ-ın metodisti H.Hüseynov, məktəb direktorlarından T.İslamov, Ə.Novruzov, veteran müəllimlərdən Ə.Qədiyev, A.Axundov və başqaları öz çıxışlarında mərhum müəllimləri bir daha yad edərək, tədbirin təşkilatçılarına təşəkkürlərini bildiriblər. Tədbirin sonunda məktəbin direktoru F.Axundov çıxış edərək keçirilən tədbirin yüksək səviyyədə təşkil olunması və aparılmasına görə  təşkilatçıya fəxri diplom təqdim edib.  

Səid MİRPENCOĞLU