Yanvarın 30-da Gəncliyə Yardım Fondunda "SOS Uşaq Kəndləri - Azərbaycan" Assosiasiyası 2 fevral - Gənclər Gününə həsr olunmuş tədbir keçirmişdir.

AzərTAc xəbər verir ki, əvvəlcə assosiasiyanın fəaliyyətindən bəhs edən videoçarx nümayiş olunmuşdur.

Tədbirdə çıxış edənlər təşkilatın həyata keçirdiyi layihələr barədə məlumat vermiş, gələcəkdə görüləcək işlərdən danışmışlar.

Bildirilmişdir ki, hər bir millətin yaşaması və inkişafı üçün gənclərin sağlam, savadlı və vətənpərvər böyüməsi ən ümdə məsələdir. 1996-cı il fevralın 2-də ulu öndər Heydər Əliyevin təşəbbüsü ilə ilk dəfə müstəqil Azərbaycan dövlətinin gənclər forumu keçirilmiş və elə həmin gün ölkəmizin tarixinə Gənclər Günü kimi yazılmışdır.

Sonra "Breyn-rinq" intellektual yarışması keçirilmişdir. Əsrimizin bəlası olan HİV, vərəm, narkotik maddələrdən istifadə, tütün asılılığının insanlara vurduğu ziyanlar və bunun qarşısını almaq üçün atılan addımlar mövzusunda keçirilən yarışda qaliblər diplom və hədiyyələrlə mükafatlandırılmışlar.

"SOS Uşaq Kəndləri"nin 1-ci və 2-ci gənclər evinin sakinləri, həmçinin alternativ qayğını tərk etmiş və tərk etməkdə olan gəncləri özündə birləşdirən Gənclərin Güvənc Körpüsü Şəbəkəsinin üzvləri də bədii proqramla çıxış etmişlər.