Bu günlərdə Azərbaycan Müəllimlər İnstitutunun Salyan filialında "Dayaq məntəqələri"nə həsr olunmuş seminar-müşavirə keçirilib. Seminar-müşavirəyə Salyan rayonu üzrə ümumtəhsil müəssisələrində yaradılmış dayaq məntəqə sədrləri, rayon təhsil şöbəsinin metodistləri dəvət olunub.

Tədbiri filialın əlavə təhsil üzrə direktor müavini N.Zeynalov açaraq qeyd edib ki, pedaqoji kadrların ixtisasartırma təhsili və müəllimlərin təkmilləşdirilməsi hazırda ən aktual məsələdir. Müəllimlər təhsildə, pedaqoji və metodiki sahələrdə ən qabaqcıl yenilikləri məhz ixtisasartırma təhsili və dayaq məntəqələri vasitəsilə öyrənir və tədris prosesində tətbiq edirlər.

Filialın "Müasir təlim metodları və dayaq məntəqələri ilə iş" kabinetinin müdiri S.Həsənovun "Dayaq məntəqələrinin fəaliyyətinin səmərəli qurulmasında pedaqoji və metodiki işin təşkili", əlavə təhsil kabinetinin müdiri B.Həsənovun "Əlavə təhsilə verilən tələblər" mövzularında məruzələri dinlənilib.

Sonra rayon təhsil şöbəsinin metodisti Tinatin Həsənova, texniki təmayüllü şəhər 7 nömrəli məktəb-liseyin riyaziyyat müəllimi, dayaq məntəqə sədri Allahverdi Piriyev, Qızılağac kənd tam orta məktəbində dayaq məntəqə sədri Xəlil Nəcəfov, internat-məktəbdə dayaq məntəqə sədri Ülviyyə Ağayeva, şəhər 4 nömrəli tam orta məktəbin dayaq məntəqə sədri Sevinc Axundova mövzular ətrafında çıxış ediblər.

Seminar-müşavirədə səslənən suallar və təkliflər diskussiya və debat şəklində müzakirə edilib.

Sonda tədbir iştirakçılarına metodik vəsaitlər paylanılıb. 

ƏDALƏT