Xudat şəhər Nəriman Nərimanov adına 2 nömrəli tam orta məktəbindəki dayaq məntəqəsində 2011-2012-ci tədris ilinin birinci yarısının yekunlarına həsr olunmuş növbəti zona müşavirəsi keçirilib. İbtidai siniflər üzrə keçirilən yığıncaqda ərazinin 20-dən artıq şəhər, qəsəbə və kənd məktəblərinin müəllimləri fənn kurikulumları ilə bağlı müzakirələr aparıblar.

Tədbirdə çıxış edən məktəb dayaq məntəqəsinin ibtidai siniflər üzrə sədri N.Əhmədova Xudat şəhər 2, 3, 4, 5 nömrəli, Xudat kənd ümumi orta, Həsənqala, Susay, Dədəli və başqa kənd məktəblərində fəaliyyət göstərən yaradıcı müəllimlərin öz işlərinə məsuliyyətlə yanaşaraq əldə etdikləri nailiyyətlərdən, "açıq dərs"lərin təşkilinin faydasından danışıb.

Sonra müşavirədə çıxış edən müəllimlər dərsliklər və iş dəftərləri ilə bağlı fikirlərini bildiriblər. Fənn kurikulumlarına  aid təcrübə mübadiləsi aparılıb və növbəti ayda keçiriləcək "açıq dərs"lərin tarixləri müəyyən edilib. 

Nəzakət KƏRİMOVA,
Xudat şəhər N.Nərimanov adına
2 nömrəli tam orta məktəbin müəllimi