Fevralın
23-də "Park İNN" otelinin "Dan ulduzu" zalında Təhsil
Nazirliyi, Gənclər və İdman Nazirliyi və "Mədəd-Azərbaycan"
təşkilatının təşkilatçılığı ilə keçirilən "Sabahın
alimləri" adlı respublika müsabiqəsinin açılışı oldu.
Açılış mərasimində təhsil naziri Misir Mərdanov, gənclər
və idman naziri Azad Rəhimov, Intel-in MDB-də korporativ
məsələlər üzrə direktoru Tatyana Nanayeva, "Mədəd-Azərbaycan"
təşkilatının icraçı direktoru Vüsal Xanlarov,
respublikanın tanınmış alimləri, pedaqoqları, Bakı və
Sumqayıt şəhərlərində fəaliyyət göstərən ümumi təhsil
müəssisələrinin IX-XI sinif şagirdləri iştirak edirdilər.
Tədbiri təhsil naziri Misir Mərdanov açaraq keçirilən
müsabiqənin əhəmiyyətindən söz açdı. Ölkəmizdə ilk dəfə
təşkil olunan bu müsabiqənin əsas məqsədinin yuxarı
sinif şagirdlərinə öz elmi nailiyyətlərini nümayiş
etdirmək imkanı vermək və onlardan 5 nəfərini seçib ABŞ-da
hər il keçirilən Beynəlxalq Elm və Mühəndislik Sərgisinə
- Intel ISEF-ə göndərmək olduğunu söyləyən nazir belə
bir mötəbər yarışda azərbaycanlı şagirdlərin uğurla
iştirak edəcəyinə ümidvar olduğunu bildirdi. Qeyd olundu
ki, "Sabahın alimləri" adlı müsabiqə dünyada ən nüfuzlu
müsabiqələrdən biri olan Intel ISEF - Beynəlxalq Elm və
Mühəndislik Sərgisi çərçivəsində keçirilir. Müsabiqənin
əsas sponsorlarından biri də Intel korporasiyasıdır.
Hər bir ölkənin inkişafının həmin ölkədə elmin və
təhsilin inkişafından asılı olduğunu bildirən təhsil
naziri Azərbaycanda güclü elmi potensialın mövcudluğunu
qeyd etdi. Ölkəmizdə elm və təhsilin inkişafının,
gənclər siyasətinin dövlətin prioritet
istiqamətlərindən olduğunu söyləyən nazir Misir Mərdanov
respublika Prezidenti cənab İlham Əliyev tərəfindən bu
məsələlərin hər zaman diqqətdə saxlanıldığını xüsusi
vurğuladı. Nazir Intel ISEF müsabiqəsinin dünyada
nüfuzlu bir müsabiqə olduğunu deyərək bu haqda ətraflı
danışdı. Bildirildi ki, Intel ISEF-in ABŞ-da keçirilən
final mərhələsinə hər il dünyanın müxtəlif ölkələrində
təşkil olunan 550-dən artıq müsabiqənin qalibləri
qatılır. Son illər Intel ISEF beynəlxalq müsabiqəsində
öz elmi layihələrini nümayiş etdirmək istəyən
şagirdlərin, eyni zamanda ölkələrin də sayı artmışdır.
2011-ci ildə bu ölkələrin sayı 65-ə çatmışdır. Nazir
belə bir mötəbər müsabiqənin dünyanın bütün ölkələri
üçün mühüm əhəmiyyət kəsb etdiyi kimi, Azərbaycan üçün
də aktual və gərəkli olduğunu qeyd etdi. Nazir Misir
Mərdanov respublikamızda təhsil sahəsində aparılan
islahatların, orta ümumi təhsil müəssisələrində tətbiq
olunan kurikulumların yeni düşüncəli, geniş dünyagörüşlü
gənclərin hazırlanmasına yönəldildiyini, şagirdlərin
tədqiqat aparması, yeni informasiya texnologiyalarından
istifadə etməsi üçün hərtərəfli imkanların yaradıldığını
söylədi. Qeyd olundu ki, bir sıra orta ümumi təhsil
müəssisələrində fəaliyyət göstərən Kiçik Akademiyalar
şagirdləri məktəb illərindən elmi tədqiqatlara cəlb
edərək onları yeni elmi axtarışlara, ətraf mühiti
yaxşılığa doğru dəyişdirməyə sövq edir.
Azərbaycanda ilk dəfə keçirilən "Sabahın alimləri"
müsabiqəsi barədə ətraflı məlumat verən təhsil naziri
onun 2012-ci ildə keçiriləcək Intel ISEF müsabiqəsinə
seçim turu olduğunu bildirdi. Müsabiqəyə Bakı və
Sumqayıt şəhərlərində fəaliyyət göstərən ümumi təhsil
müəssisələrinin IX-XI sinif şagirdləri tərəfindən yerinə
yetirilmiş tədqiqat layihələri təqdim olunub. Müsabiqəyə
elmi dəstək verən Bakı Dövlət Universiteti və Sumqayıt
Dövlət Universitetinin professor-müəllim heyəti
gələcəyin alimləri üçün elmi ünsiyyət mühitinin
formalaşmasına xüsusi diqqət yetiriblər. Bu ali təhsil
müəssisələrinin laboratoriyaları öz qapılarını
şagirdlərin üzünə açaraq onlara müasir avadanlıqlardan
istifadə etmək və elmi rəhbərləri ilə birgə tədqiqatlar
aparmaq imkanı yaradıb.
Nazir daha sonra qeyd etdi ki, müsabiqədə 47 elmi
layihənin müəllifləri olan şagirdlər iştirak edir. Həmin
layihələrdən 18-i kollektiv, 29-u isə fərdi şəkildə
hazırlanıb. Şagirdlərin elmi layihələri riyaziyyat,
fizika, kimya, biologiya, tibb və sağlamlıq, ekologiya,
mühəndislik, kompüter elmləri kateqoriyaları üzrə
qiymətləndiriləcəkdir. Müsabiqəyə yalnız yeni elmi
ideyası, eksperimentin, mühəndis layihəsinin texniki
təsviri, innovativ kompüter proqramının təsviri olan
layihələr qəbul edilib. Müsabiqənin final mərhələsinə
Elmi Ekspertiza Komitəsi tərəfindən baxış keçirilən və
annotasiyaları təsdiq edilən layihələr buraxılıb.
Təhsil naziri layihələrin qiymətləndirilməsi üçün
respublikamızın tanınmış alimlərindən ibarət münsiflər
heyətinin yaradıldığını deyərək tədbirin keçirilməsində
əməyi olanlara təşəkkürünü bildirdi. Nazir Misir
Mərdanov Gənclər və İdman Nazirliyi, "Mədəd-Azərbaycan"
təşkilatı, Intel korporasiyası ilə əməkdaşlığın bundan
sonra da davam etdiriləcəyinə ümidvar olduğunu
bildirərək Azərbaycanın istedadlı şagirdlərinin dünyanın
belə bir nüfuzlu müsabiqəsinə qatılmalarını təqdirəlayiq
hal kimi qiymətləndirdi və onların ölkəmizi layiqincə
təmsil etmələrini arzuladı.
Mərasimdə çıxış edən gənclər və idman naziri Azad
Rəhimov müsabiqənin əsas məramının ümumi təhsil
müəssisələrinin yuxarı sinif şagirdlərinə öz elmi
nailiyyətlərinin nümayişinə şəraitin yaradılması ilə
yanaşı, həmçinin onların elm və texnika sahəsində öz
yaradıcılıq potensialını yüksəltmələrini təmin etmək
olduğunu bildirdi. Nazir Azad Rəhimov Azərbaycanda ilk
dəfə keçirilən bu müsabiqənin iştirakçılarına uğurlar
dilədi.
"Mədəd-Azərbaycan" təşkilatının icraçı direktoru Vüsal
Xanlarov çıxış edərək təmsil etdiyi qurumun gördüyü
işlərdən danışdı. Keçirilən müsabiqənin azərbaycanlı
şagirdlərin dünya miqyasında öz bilik və bacarıqlarını
nümayiş etdirməyə imkan yaratdığını söylədi.
Intel-in MDB-də korporativ məsələlər üzrə direktoru
Tatyana Nanayeva rəhbərlik etdiyi təşkilatın fəaliyyəti,
Intel ISEF- Beynəlxalq Elm və Mühəndislik Sərgisi ilə
bağlı məruzə-təqdimatla çıxış etdi. Təqdimatda
adıçəkilən müsabiqədə iştirak edən ölkələr, həmin
ölkələrin şagirdlərinin əldə etdiyi nəticələr və digər
məsələlər barədə tədbir iştirakçılarına ətraflı məlumat
verildi. Tatyana Nanayeva sonda bu il Azərbaycanın
müsabiqədə iştirak etməsindən məmnun olduğunu dedi və
şagirdlərə müvəffəqiyyətlər arzu etdi.
Onu da qeyd edək ki, 24 fevral tarixində keçiriləcək
mükafatlandırılma mərasimində müsabiqənin qaliblərinə
pul mükafatı, diplom və medal təqdim olunacaq. Münsiflər
heyəti tərəfindən seçilən 5 şagird cari ilin mayında ABŞ-ın
Pitsburq şəhərində keçiriləcək Intel ISEF müsabiqəsində
iştirak etmək hüququ qazanacaq.
Samirə KƏRİMOVA |