Bakıdakı sağlamlıq imkanları məhdud olan uşaqlar üçün
2 nömrəli internat-məktəbdə Xocalı soyqırımının 20-ci
ildönümünə həsr olunmuş tədbir keçirildi. Öncə bir
dəqiqəlik sükutla şəhidlərin xatirəsi yad edildi.
Məktəbin direktoru Kamil Məmmədov bildirdi ki, 1992-ci
il fevralın 25-dən 26-na keçən gecə xalqımız öz
taleyinin ən faciəvi anlarını yaşadı. Xocalı yerlə
yeksan oldu, yüzlərlə günahsız insan, uşaq və
yeniyetmələr vəhşicəsinə qətlə yetirildi. Xocalı
faciəsi öz vəhşiliyinə və amansızlığına görə
bəşəriyyətə qarşı törədilmiş cinayət aktıdır. Vurğulandı
ki, Xocalı faciəsindən 20 il ötsə də, dəhşətli hadisələr
tariximizin və zaman-zaman insanlarımızın qan
yaddaşından heç vaxt silinməyəcək.
Sonra müəllimlər Əsarə Cəfərova və Nədafə Zalıyeva
erməni daşnaklarının xalqımızın başına gətirdikləri
müsibətlərdən bəhs etdilər. Bildirdilər ki, xalqımız öz
dövlətinin suverenliyi və ərazi bütövlüyü uğrunda
mübarizədə sıx birləşdi, mətinlik və qəhrəmanlıq
nümayiş etdirdi.
Tədbirin sonunda şagirdlərin ifasında "Xocalım mənim"
ədəbi-bədii kompozisiya nümayiş olundu.
Sifai SƏFƏROVA |