Bakıdakı
261 nömrəli məktəb-liseydə riyaziyyat müəllimi İlhamə
Abdullayevanın V "b" sinfində "9-a və 3-ə bölünmə
əlamətləri" mövzusunda İKT-nin tətbiqi ilə "açıq dərs"i
oldu. Dərsdə məqsəd müstəqil işlər vasitəsilə
riyaziyyatdan qazanılmış nəzəri biliklərin şagirdlər
tərəfindən tətbiqi idi. Müəllim dərsdə interaktiv
təlim metodlarından istifadə edərək şagirdlərin
fəallığının artırılmasını, riyazi anlayışların və
təriflərin şüurlu surətdə dərk edilməsini dərsin əsas
xüsusiyyəti kimi diqqət mərkəzində saxladı. Belə ki,
dərsin müəllim - şagird dialoqu əsasında interaktiv
təlim ruhuna uyğun təşkili keçirilən mövzunun sinfin
əksəriyyəti tərəfindən yüksək səviyyədə mənimsənilməsinə
şərait yaratdı. İ.Abdullayeva motivasiya sualı ilə
şagirdlərin məntiqi düşüncəsini inkişaf etdirmək
məqsədilə nağıl dünyasına inteqrasiya etdi: "Kim "Ayı
və şir" təmsilini bilir?". Ekranda slaydlarla təmsildən
bir parçanı göstərərək "Həyatda bölmək istəmədiyiniz
nələr var" - sualı ilə müəllim şagirdlərə müraciət
etdi. Şagirdlərin bir qismi vətənini, torpaqlarımızı,
bəzisi biliyini bölmək istəmədiyini söylədilər. Müəllim
cavablara öz münasibətini bildirdi və biliyini bölmək
istəməyən şagirdlərə isə Məhəmməd peyğəmbərin "dünyada
ən böyük sədəqə elmi bilməyənlərə öyrətməkdir" kəlamını
xatırlatdı. Sadə məntiqi misallarla yeni dərs şagirdlərə
öyrədildi. Əvvəlcədən bölünmüş - "bölünən", "bölən", "qismət"
qrupları öz liderlərini seçdi. Şagirdlər liderlərin
nəzarəti altında iş vərəqləri üzərində müəyyən vaxt
ərzində işləyərək doğru cavabları araşdırdılar.
İ.Abdullayeva "açıq dərs"də qiymətləndirməni hər bir
qrup üçün meyar cədvəlinə əsasən həyata keçirməklə
dərsin bütün mərhələlərində qiymətləndirmə işi apardı.Ən
maraqlısı bu idi ki, bu prosesi V " b" sinif
şagirdləri özləri müstəqil həyata keçirdilər. Bununla
şagirdlər dərsdə həm də biliyi qiymətləndirmək
vərdişinə yiyələndilər.
Sonda İlhamə Abdullayevanın riyaziyyatdan keçdiyi "açıq
dərs" müzakirə olundu. Məktəbin direktoru Abuzər Əsədov,
riyaziyyat müəllimlərindən Nəsimi Abbasov, Tamam
Sərdarova, Sevil Rzayeva və başqaları çıxış edərək "açıq
dərs"in yaxşı təşkil olunduğunu və şagirdlərin yüksək
bilik nümayiş etdirdiklərini bildirdilər.
Mahniyar ABDULLAYEVA,
əməkdar müəllim |