Böyük Britaniyanın məşhur "Times" qəzetinin təhsil
əlavəsi olan "Times Higher Education Supplement - QS
World Universities Rankings" jurnalı dünyada hər il
universitetlərin reytinqlərini hesablayan ən etibarlı
mənbələrdən biri kimi tanınır. Onun reytinqlərinin
nəticələrindən dünyada 30 milyondan çox istifadəçi
faydalanmaqdadır. Bu günlərdə jurnalın rəsmi saytında
yerləşdirilmiş 2011-ci il üzrə hesabatda müxtəlif
indikatorlara əsasən dünya universitetlərinin beynəlxalq
tələbə nisbətinə görə müəyyənləşdirilmiş reytinqi
verilib.
Şərqi Avropa və Orta Asiyada fəaliyyət göstərən
universitetlərin akademik reytinqi hesabatında Qafqaz
Universitetinin adı xüsusilə qeyd olunub. Hesabatda
göstərilir ki, Qafqaz Universiteti beynəlxalq tələbə
indikatoruna görə dünyanın 100 ən yaxşı universiteti
arasında 64-cü yerdə qərar tutur. Beynəlxalq tələbə
indikatoru universitetin tələbələrinin ümumi sayında
xarici tələbələrin nisbəti, tələbə mübadilələri və bu
universitet məzunlarının magistratura və doktorantura
pillələrində təhsillərinin coğrafiyasına görə
hesablanır. Qafqaz Universitetində 10-dan artıq ölkəni
təmsil edən tələbələrin təhsil alması və universitet
məzunlarının əhəmiyyətli bir hissəsinin dünyanın 50-dən
artıq ölkəsində magistratura və doktorantura
pillələrində təhsillərini davam etdirməsi bu ali təhsil
ocağının reytinq cədvəlində dünyanın məşhur və tarixi
universitetlərindən daha yüksək pillədə qərar tutmasına
səbəb olub.
Sevindirici haldır ki, Qafqaz Universiteti bu indikatora
görə nəinki postsovet məkanının, eyni zamanda Şərqi
Avropa və Yaxın Şərqin reytinq siyahısına düşmüş ilk
universitetidir. Beynəlxalq tələbə indikatoruna görə
Qafqaz Universiteti 90,9 xalla ABŞ, İngiltərə, Kanada və
bir sıra Avropa ölkələrilə yanaşı, Azərbaycanın adını
dünyanın bu siyahıda yer alan 14 ölkəsi sırasına
yazdırmışdır.
Yusif ƏLİYEV |