Fevralın 22-də Azərbaycan Dillər Universitetində  ATƏT-in Bakı ofisinin rəhbəri Koray Tarqay ADU-nun regionşünaslıq və beynəlxalq münasibətlər fakültəsinin tələbələri ilə görüşdü.

Koray Tarqay Azərbaycanın ATƏT-ə üzv olmasının 20 illiyi ilə əlaqədar keçdiyi yol haqqında  mühazirə ilə çıxış etdi. Öncə ATƏT-in fəaliyyəti haqqında qısaca danışan Koray Tarqay  qurumun  57 üzvünün olduğunu bildirdi. O, hazırda ATƏT-in Bakı ofisində 50-ə yaxın əməkdaşın çalışdığını iştirakçıların nəzərinə çatdırdı. Ofisin rəhbəri Azərbaycanın ATƏT-ə 1992-ci ildə üzv olmasına baxmayaraq həyata keçirdiyi layihələri 2000-ci ildən etibarən gücləndirdiyini qeyd etdi.

Koray Tarqay  ATƏT-in həyata keçirdiyi digər  layihələr haqqında tələbələrə məlumat verdi. Hər il 80-90-a yaxın layihə hazırlandığını və bunların çoxuna müsbət cavab aldıqlarını dedi.  O, keçən il Azərbaycanda gənclər üçün təşkil olunmuş bir neçə layihə haqqında danışdı və tələbələrə belə layihələrdə  iştirak etmələrini məsləhət gördü. Bundan başqa ATƏT-in Bakı ofisinin rayonlarda da xidmət göstərdiyini vurğuladı. 

Tədbirdə çıxış edən regionşünaslıq və beynəlxalq münasibətlər fakültəsinin dekanı Məcid Əliyev ofisin rəhbərinə təşəkkürünü bildirdi və onu Azərbaycan Dillər Universitetində görməkdən məmnunluq hissi keçirdiyini deyərək mühazirənin tələbələr üçün əhəmiyyətli olduğunu söylədi.

Sonda tələbələrin sualları cavablandırıldı. 

ADU-nun Mətbuat xidməti