Bu
günlərdə Türkiyə Cümhuriyyətinin Qars Qafqaz
Universitetində "Sürətləndiricilər və elementar
zərrəciklər fizikasında kompüter proqramları" məktəbi
təşkil olunmuşdur. Tədbir Türkiyə Elmi və Texnoloji
Tədqiqat Qurumu (TUBİTAK) və Qars Qafqaz Universitetinin
təşkilatçılığı ilə gerçəkləşdirilmişdir. Türkiyənin
əksər universitetləri ilə yanaşı, dünyanın ən iri yüksək
enerji fizikası laboratoriyası sayılan Avropa Nüvə
Araşdırmaları Təşkilatı - CERN-in yüksək ixtisaslı
mütəxəssisləri də burada iştirak etmişdir. Birhəftəlik
məktəb proqramı çərçivəsində ikigünlük ümumi
tədbirlərdən sonra iştirakçılar sürətləndirici və
parçacıq fizikasından ibarət olan iki qismə ayrılmışdır.
Tədbirdə Azərbaycandan qatılan 7 nəfərlik nümayəndə
heyətinin tərkibində Naxçıvan Dövlət Universitetindən
informasiya-kommunikasiya texnologiyaları şöbəsinin
müdiri Xaliq Babayev və universitetin iki magistrantı -
Hüseyn Qasımov və Ramin Fərəcov da iştirak etmişlər.
Kompüter proqramları ilə bağlı məktəb dünyada
informasiya-kommunikasiya texnologiyalarının ən son
nailiyyətlərini mənimsəmək, yüksək enerjili fizika və
proqramlaşdırma sahəsində bilik və təcrübələri mübadilə
yolu ilə daha da inkişaf etdirmək, təhsil və tədris
sahəsində tətbiq etmək məqsədilə təşkil olunmuşdur.
Burada iştirak edən 45 tələbəyə mövzu ilə bağlı nəzəri
dərslər keçilməklə yanaşı, praktiki məşğələlər də
aparılmış, tələbələrin hazırladıqları müxtəlif
proqramlar və layihələr müəllimlər tərəfindən
qiymətləndirilmişdir. Sonda sertifikatlar təqdim
olunmuşdur.
Mehriban SULTAN,
NDU-nun Mətbuat şöbəsinin müdiri |