Fevralın 24-də Bakıdakı 20 nömrəli məktəb-liseydə Xocalı soyqırımının 20-ci ildönümünə həsr edilmiş tədbir keçirildi. Tədbirdə məktəbin müəllim-şagird kollektivi ilə yanaşı, Yasamal Rayon İcra Hakimiyyətinin başçısı İbrahim Mehdiyev, Bakı Metropoliteninin rəisi Tağı Əhmədov, Xocalı sakinləri və digər şəxslər iştirak edirdilər.

Tədbiri giriş sözü ilə açan məktəb-liseyin direktoru Sabir Məmişov faciənin dəhşətlərindən, dinc əhaliyə qarşı erməni yaraqlılarının törətdikləri vəhşiliklərdən danışdı. Xocalı faciəsinin Azərbaycanın tarixində qanlı bir səhifə, insanlığa qarşı törədilmiş misli görünməmiş terror hadisəsi olduğunu bildirən direktor həmin dövrdə hakimiyyətdə olan rəhbərlərin xəyanətkarlıq mövqeyini diqqətə çatdırdı. Qeyd etdi ki, dünya ictimaiyyəti bu acı həqiqəti bilməli və əsrin faciəsi-Xocalı soyqırımı beynəlxalq qurumlar tərəfindən öz hüquqi qiymətini almalıdır.

Tədbirdə çıxış edən Yasamal Rayon İcra Hakimiyyətinin başçısı İbrahim Mehdiyev Xocalı faciəsinin ötən əsrin ən dəhşətli faciələrindən biri və ermənilərin mənfur siyasətinin ən iyrənc nümunəsi olduğunu qeyd etdi. Bildirdi ki, erməni qəsbkarları  XIX əsrdən başlayaraq müxtəlif  dövrlərdə  xalqımıza qarşı  işğalçı siyasət yeridərək,  öz   məkrli  planlarını zaman-zaman  həyata keçiriblər.   Xocalı soyqırımı  isə bunların  ən dəhşətlisi, dinc əhaliyə qarşı   misli görünməyən  zorakılıqdır. İ.Mehdiyev qeyd etdi ki, ümummilli lider Heydər Əliyevin müdrik  siyasəti nəticəsində 1994-cü ildə bu dəhşətli faciəyə siyasi qiymət verilmiş və bundan sonra Xocalının haqq səsinin dünya ictimaiyyətinə çatdırılması istiqamətində mühüm işlər görülmüşdür.

Tədbirdə çıxış edən Bakı Metropoliteninin rəisi Tağı Əhmədov, Xocalı sakini Xəlil Vəliyev və başqaları soyqırımının dəhşətlərindən danışdılar.

Tədbirdə şagirdlərin söylədikləri şeirlər, göstərdikləri səhnəciklər iştirakçılarda kədərli anlar yaşatdı. 

Niyazi RƏHİMOV