Bu
gün dünyanın bir çox ölkələrində olduğu kimi,
Azərbaycanda da 8 mart Beynəlxalq Qadınlar günü kimi
qeyd olunur.
Bu bayramın tarixi kökləri uzun illərə dayanır.
8 mart 1857-ci ildə ABŞ-ın Nyu-York şəhərində geyim
sektorunda çalışan yüzlərlə qadının aşağı maaşa, uzun
çalışma saatlarına və eyni zamanda çətin iş şəraitinə
etiraz olaraq tətil etməsi günü əsas götürülməklə
1910-cu ildə bayram günü kimi qəbul edilib. BMT-də
1975-ci ildə 8 mart ilk dəfə Beynəlxalq Qadınlar günü
olaraq keçirildi. İki il sonra, 1977-ci ildə isə nəhayət,
BMT-nin ümumi qurultayında 8 mart qadın hüquqları və
beynəlxalq bayram günü olaraq qeyd edildi. Beynəlxalq
Qadınlar günü eyni zamanda qadın hüquqlarının
genişləndirilməsini və bugünkü qadının daha da azad
olmasının tarixi səbəblərinin xatırlanması üçün də
xüsusi gündür.
Azərbaycan qadını azadlıq əldə etdikdən sonra sürətlə
inkişaf etmiş və cəmiyyətin də inkişaf etməsinin
səbəbkarı olmuşdur.
Təsəvvür edin, əgər hazırda ölkəmizdə səhiyyə və təhsil
sahəsində işləyənlərin böyük əksəriyyətini qadınlar
təşkil edirsə, görün, qadınlar savadsızlıqdan, çadra
altından çıxandan sonra, cəmiyyətdə hüququ olmadığı bir
zamandan bəri tarixi nöqteyi-nəzərdən qısa bir dövrdə nə
qədər sıçrayış əldə etmiş, inkişaf etmişlər.
Təbiidir ki, qadınlar üçün yaradılmış şərait, ölkəmizdə
qadınlara göstərilən münasibət və qayğı, eyni zamanda
qadınların daxili istedadı, onların potensialı, ağlı,
zəkası, biliyə, təhsilə, elmə, mədəniyyətə olan hədsiz
marağı və öz istedadlarını həyata keçirmək üçün
çalışqanlığı - bunlar hamısı birlikdə Azərbaycan
qadınını yüksəklərə qaldırmışdır. Biz fəxr edə bilərik
ki, qadınlar cəmiyyətimizdə çoxluq təşkil edir. Çünki
əhalimizin 51 faizindən çoxu qadınlardır.
Ümummilli liderimiz Heydər Əliyev bir çıxışında qeyd
etmişdir ki, "təbiət dünyanı dəyişdirərkən cənnəti
qadınla əvəz etdi. Həqiqətən belədir! Nə qədər gözəl
sözdür, ədalətli ifadədir! Cəmiyyətdə, həyatda, insan
cəmiyyətində qadının yerini nə qədər gözəl göstərir!".
Azərbaycan qadını tarix boyu öz ağlı, zəkası, namusu,
qeyrəti, isməti, fədakarlığı, çalışqanlığı, mərdliyi,
vətənpərvərliyi ilə millətinə, torpağına olan hədsiz
məhəbbəti və gözəlliyi ilə tanınmışdır. Ancaq bununla
bərabər, əsrlər boyu Azərbaycan qadınının üzərinə böyük
zəhmətlər düşmüşdür. O zəhməti də qadınlarımız həmişə
mərdliklə, cəsarətlə çəkmişlər və heç vaxt bu zəhmətdən
inciməmişlər.
Tarixi keçmişimizdə Azərbaycan qadınının görkəmli
nümayəndələri olmuşdur. Həmişə ilkləri ilə tarixə iz
salan türklər öz qeyrətli, savadlı qadınları ilə də
tanınmışlar. İlk qadın hökmdarlarımızdan olan Tomris,
Şərqdə ilk diplomat qadın Sara xatun, düşmənlərini adı
ilə lərzəyə salan Nüşabə, misraları dillər əzbəri olan
Məhsəti, öz xeyirxah əməlləri ilə tarixə səs salan
Natəvan və bu kimi yüzlərlə azəri qanı daşıyan
Azərbaycan xanımlarının adlarını çəkə bilərik.
XX əsr Azərbaycan qadını üçün böyük nailiyyətlər,
uğurlar əsri olmuşdur. Azərbaycan dövləti tərəfindən
yaradılmış əlverişli şərait sayəsində cəmiyyətdə, onun
ictimai-siyasi həyatında və ölkənin demokratik
quruculuğunda fəal rol oynayan qadınlarımız ölkənin
inkişafı üçün əllərindən gələni edirlər. Hazırda
Azərbaycanın gender siyasətinin əsas prioritetlərindən
biri kənd mühitində yaşayan qadınların ölkənin ictimai
həyatına inteqrasiyası və onların məşğulluğudur. Bu
istiqamətdə müəyyən proqramlar həyata keçirilir və bir
çox işlər artıq görülüb. Bundan başqa, Azərbaycan
hökuməti onların iqtisadi-siyasi sferada öz
potensiallarını üzə çıxarmaq üçün bütün lazımi imkanları
yaradır.
Azərbaycan xanımlarının cəmiyyətdə rolunun ən bariz
nümayəndəsi Azərbaycanın birinci xanımı Mehriban
Əliyevadır. Azərbaycanın birinci xanımı, YUNESKO-nun və
İSESKO-nun xoşməramlı səfiri, Milli Məclisin deputatı
Mehriban Əliyeva özünün gördüyü xeyriyyə və uğurlu
işləri ilə nəinki bütün Azərbaycan xanımlarının, eləcə
də bir çox ölkələrin xanımlarının rəğbətini qazanıb.
Bütün Azərbaycan qadınları Heydər Əliyev Fondunun
prezidenti Mehriban Əliyevanın çoxşaxəli fəaliyyətindən,
nəcib və xeyirxahlıq keyfiyyətlərindən nümunə götürərək
cəmiyyətdə öz yerlərini tutmaq üçün çalışmalıdırlar.
Əziz qadınlar! 8 mart - Beynəlxalq Qadınlar günü
münasibətilə sizləri ürəkdən təbrik edir, sizə
cansağlığı, ailə səadəti və bütün işlərinizdə uğurlar
arzulayıram.
Aqiyə NAXÇIVANLI,
AMİ-nin rektoru, professor,
Milli Məclisin deputatı
Əziz xanımlar!
Azərbaycan
qadını bəşəriyyətə böyük dahilər bəxş etməklə yanaşı, öz
ictimai nüfuzu, cəmiyyətdə, ailədə özünəməxsus yeri olan
varlıqdır. Sürətlə maariflənən qadınlarımız yüz illərdən
bəri formalaşmış milli dəyərlərə sadiq qalmaqla ana
dilimizin, mədəniyyətimizin və mənəviyyatımızın ən
etibarlı dayağı olmuşlar. Keçmişimizin unudulmaz
səhifələrindəki möhkəm iradəyə malik görkəmli qadın
şəxsiyyətlərimizin yüksək ləyaqətinin, ağbirçək
analarımızın müdrikliyinin daşıyıcıları kimi müasir
Azərbaycan xanımları öz dərin zəkaları və tükənməz
daxili potensialları ilə bu gün də xalqa və cəmiyyətə
fədakarcasına xidmət edirlər.
Dövlət müstəqilliyimizin bərpasından sonra ötən iyirmi
il ərzində Azərbaycan qadını milli dövlət quruculuğu
prosesinin fəal iştirakçısına çevrilmiş, ölkəmizin
sosial-iqtisadi, intellektual-mədəni potensialının
artırılması üçün dəyərli töhfələr vermişdir. Elm və
təhsil, səhiyyə və mədəniyyət, eləcə də digər sahələrdə
qazandığı uğurları ilə o, öz nüfuzunu ilbəil artırmağa
müvəffəq olmuşdur. Vətəndaş cəmiyyəti quruculuğu
istiqamətində qadınlarımızın nailiyyətləri məmnunluq
hissi doğurur. Ölkəmizdəki sabitlik və demokratik mühit
qarşıdakı illərdə də qadınlara öz fitri istedadlarını,
yaradıcılıq imkanlarını tam gerçəkləşdirə bilmələri üçün
bütün lazımi şəraiti təmin edir.
İndi Azərbaycan qadını cəmiyyətdə öz sözünü deyir,
dövlət idarəçiliyində, təhsil, elm, səhiyyə sahələrində
fəal iştirak edir. Belə ki, respublika üzrə ümumtəhsil
və orta ixtisas təhsili müəssisələrində müəllimlərin 74
faizi, ali təhsil müəssisələrində 46 faizi, həkimlərin
63 faizi qadınlardır. Elmin inkişafında da qadınların
müstəsna rolu var. Hazırda doktorantların 46 faizini,
bütün elmi işçilərin isə 51 faizini qadınlar təşkil edir.
Son 5 ildə doktorluq dərəcəsi olan qadınların sayı 22
faiz artıb. Azərbaycan Milli Elmlər Akademiyasının
müxbir üzvlərindən 12-si, akademiklərdən 3-ü qadındır.
Çoxminli müəllim ordusunun yarıdan çoxunu təşkil edən
qadınlarımızın əməyi nəticəsində cəmiyyət formalaşır,
savadlı, bilikli, geniş dünyagörüşlü, nümunəvi əxlaqa
malik insanlar yetişir. Bu insanlar isə cəmiyyəti daha
da inkişaf etdirir. Hazırda dövlətimizin müstəqilliyinin
möhkəmlənməsində fəal iştirak edən insanlar məhz müəllim
əməyinin yetirmələridir. Müəllimlər yeni cəmiyyət
quruculuğunun memarlarıdır. Hər birimizin layiqli
vətəndaş kimi yetişməyində müəllimlərimizin əvəzsiz
xidmətləri olmuşdur. Ümummilli liderimiz Heydər Əliyev
həmişə müəllim əməyini yüksək qiymətləndirib, müəllim
haqqında xoş sözlər söyləyib. Bu işi möhtərəm
Prezidentimiz İlham Əliyev davam etdirir.
Siz evdə qadın, ana kimi, cəmiyyətdə müxtəlif peşələrin
sahibi kimi həmişə haqqa, ədalətə, sabitliyə can atmaqla
cəmiyyətin inkişafına töhfələr verirsiniz. Bu gün ən
sevindirici məqamlardan biri də xanım müəllimlərimizin
artıq beşinci dəfə keçirilən "Ən yaxşı müəllim"
müsabiqəsində fəal iştirakı, həm də qaliblərin 90
faizini təşkil etməsidir. Bu, bir daha müasir
Azərbaycan qadınının öz peşəsini, müəllim adının
şərəfini uca tutduğunu, özünün əməyi, əxlaqı, milli
mənəvi dəyərlərə sədaqəti ilə həyatda örnək olmağa qadir
olduğunu sübut edir.
Qloballaşan dünyada dəyərlər sisteminin sürətli
dəyişikliklərə məruz qaldığı indiki vaxtda siz
milli-mədəni zənginliklərimizin və əxlaqi-mənəvi
sərvətlərimizin qorunub saxlanılmasının həqiqi
təminatçılarısınız. Gənc nəslin qədim adət-ənənələrimizə,
milli məfkurəyə və dövlətçilik ideallarımıza sədaqət
ruhunda tərbiyəsinə xüsusi diqqət yetirməklə üzərinizə
düşən işlərin öhdəsindən hər zaman olduğu kimi yenə
şərəflə gəlirsiniz.
Ümidvaram ki, siz gənc nəslin milli adət-ənənələrə,
azərbaycançılıq məfkurəsinə bağlılıq ruhunda tərbiyəsi
işinə bundan sonra da xüsusi diqqət yetirəcək, dinamik
inkişaf edən ölkəmizin gələcəyi naminə qüvvənizi, bilik
və bacarığınızı əsirgəməyəcəksiniz.
Əziz xanımlar!
Sizi və sizin şəxsinizdə bütün Azərbaycan xanımlarını 8
mart - Beynəlxalq Qadınlar günü münasibətilə
səmimi-qəlbdən təbrik edirəm. Sizə hər zaman gözəllik,
zəriflik və təbəssüm, xoşbəxtlik, cansağlığı, səadət və
işlərinizdə yeni-yeni uğurlar arzulayıram.
Bayramınız mübarək olsun!
Nailə RZAQULİYEVA,
Bakı Şəhəri üzrə Təhsil İdarəsinin müdiri,
əməkdar müəllim
Hörmətli qadınlar!
Sizi
8 mart - Beynəlxalq Qadınlar günü münasibətilə ürəkdən
təbrik edirəm.
İlin ən gözəl fəsillərindən biri olan yaz fəsli gəlir.
Baharin gəlişi bayramların da başlanğıcıdır. Belə
bayramlardan biri də Beynəlxalq Qadınlar günüdür.
Azərbaycan qadınları dünyanın ən gözəl və xoşbəxt
qadınlarındandır. Çünki qadın xoşbəxtliyi üçün vacib
olan şərtlərdən biri onun övladının sakit, əmin-aman bir
şəraitdə, inkişaf etmiş dövlətdə yaşamasıdır. Azərbaycan
qadını öz iradəsi və mərdliyi, saflığı və sədaqəti ilə
cəmiyyətimizin həyatında, xalqımızın milli mənəvi
dəyərlərinin formalaşmasında xüsusi rol oynamışdır.
Bildiyiniz kimi, təhsil sahəsi respublikamızda ən
aparıcı sahələrdəndir. Təsadüfi deyil ki, Azərbaycan
qadınlarının böyük əksəriyyəti təhsil sahəsində çalışır.
Azərbaycan qadını övladını təkcə ailədə yetişdirməklə
kifayətlənmir, ailə prinsipləri üzərində qurulan
cəmiyyətin prinsiplərini təhsilə gətirməklə ölkəmizi
irəli apara biləcək milli, mənəvi dəyərləri özündə
daşıyan Azərbaycan gənclərini yetişdirir. Azərbaycan
qadını həm evdə, həm də çalışdığı müəssisədə üzərinə
düşən vəzifələri həmişə layiqli şəkildə, qürur hissi
duyaraq yüksək səviyyədə həyata keçirməyə can atır.
Onlar analıq və qadınlıq məsuliyyəti ilə bərabər bu
çətin və şərəfli peşənin yükünü çiyinlərində layiqincə
daşıya bilirlər. Bütün bunlara baxmayaraq, qadınlarımız
ölkəmizin ictimai-siyasi həyatında da xüsusi rol
oynayırlar. Dövlətimizin qadınlara göstərdiyi diqqət və
qayğı nəticəsində Azərbaycan qadınları respublikamızın
inkişafına və tərəqqisinə xüsusi töhfə vermişlər.
Qadınlar cəmiyyətimizdə gedən demokratikləşmə
prosesindən istifadə edərək qısa bir müddətdə yeni
dövrün tələblərinə uyğun qadın təşkilatları yaratdılar.
Beynəlxalq miqyasda fəaliyyət göstərən qadın
təşkilatları öz əsas məqsədləri kimi Azərbaycanda
qadının nüfuzunun daha da artırılmasını, onun
sosial-iqtisadi problemlərinin həllini və sair
məsələləri qeyd edirlər.
Bu gün Azərbaycan qadınları dünyanın ən nüfuzlu
təşkilatlarında təmsil olunurlar. Fürsətdən istifadə
edərək ölkəmizin birinci xanımı, YUNESKO-nun və İSESKO-nun
xoşməramlı səfiri, Heydər Əliyev Fondunun prezidenti,
Milli Məclisin deputatı Mehriban Əliyevanı və bütün
Azərbaycan qadınlarını təbrik edir, uzun ömür və
cansağlığı arzulayıram.
Məhəbbət VƏLİYEVA,
Bakıdakı akademik Zərifə Əliyeva adına liseyin direktoru
|