Naxçıvan Müəllimlər İnstitutunda "Psixoloq" qəzetinin baş redaktoru Tahir Heydərovun iştirakı ilə sosial psixoloji xidmət ixtisası üzrə təhsil alan tələbələrlə görüş keçirilmişdir.

Görüşdə institutun rektoru, professor Oruc Həsənli çıxış edərək bildirmişdir ki, bu ixtisas üzrə təhsil alan tələbələr  gələcəyin əsl sosial psixoloqları kimi yetişməli, seçdikləri ixtisasa dərindən yiyələnməyi bacarmalıdırlar. Çünki müasir dövrdə həyatın bütün sahələrində psixoloji xidmət önəmli yer tutur. Sosial psixoloq kadrlarının öz peşə  ixtisasları üzrə uğurla fəaliyyət göstərmələrinin səbəbi onların institutda aldıqları nəzəri bilikləri təcrübədə tətbiq etmək bacarıqlarından ibarətdir. Bunu nəzərə alaraq  institutumuzda nəzəriyyə ilə təcrübəni uzlaşdıran psixoloji xidmət mərkəzləri yaradılmışdır.  "Psixoloq" qəzetinin baş redaktoru Tahir Heydərov çıxış edərək KİV-in psixoloji xidmətlərinin əhalinin sosial biliklərlə məlumatlandırılması barədə ətraflı danışmışdır. Qeyd olunmuşdur ki,  bu məsələdə psixoloq kadrlarının rolu danılmazdır. Onlar da öz peşələrinin sirlərini daha yaxşı bilmək üçün mütəmadi olaraq KİV-dən yararlanmalıdırlar.

Sonda tələbələri maraqlandıran suallar cavablandırılmışdır. 

Naxçıvan Müəllimlər İnstitutunun Mətbuat xidməti