"British Council" və "Mədəd-Azərbaycan" ingilis dilinin tədrisi prosesində elektron tədris resurslarından istifadə istiqamətində müəllimlərin imkanlarını genişləndirmək məqsədi ilə birgə layihəyə imza atmışlar. Layihə müvafiq peşəkar inkişaf imkanları vasitəsilə ingilis dilinin öyrənilməsi və tədrisi üzrə "British Council"in resursları haqqında 100 müəllim və 500 tələbənin biliklərini artıracaq. 2012-ci ildə keçirilməsi nəzərdə tutulan pilot layihədən Bakı, Sumqayıt, Şirvan, Göyçay və Mingəçevirdən olan müəllimlər faydalanacaqlar.

Layihə iştirakçıları ingilis dilinin tədrisində elektron resurslardan istifadə edilməsi haqqında yeni üsulların öyrənilməsi və bacarıqların inkişaf etdirilməsi məqsədi ilə bir sıra təlim sessiyalarında iştirak edəcəklər. Təlimdən sonra müəllimlər "British Council" və "Mədəd-Azərbaycan" tərəfindən dəstəklənən onlayn ünsiyyət vasitələrinin köməyi ilə təcrübələrini bölüşmək və şəbəkələşmək imkanı əldə edəcəklər. Belə ki, "British Council"in bu innovativ tədris resursları gündəlik sinif fəaliyyətinə inteqrasiya olunacaq.

Layihənin əsas məqsədi müəllimlər tərəfindən müxtəlif vasitələrin köməyi ilə məlumatların əldə edilməsinə yönəldilmişdir. Artıq bu gün müəllimlərin hər hansı bir materialı əldə etməsi   üçün iş yerindən uzaqlaşmasına ehtiyac yoxdur, onlar istənilən vaxt onlayn kitabxana resurslarına və xidmətlərinə daxil ola bilərlər.  

Hicran ƏKBƏROVA