İnformasiya və kommunikasiya texnologiyaları müntəzəm olaraq müəllimləri, kurikulum mütəxəssislərini, ümumilikdə təhsil sahəsində çalışanları birləşdirərək onların inkişafına təkan verir.

Təhsil sahəsində texnologiyaların tətbiqi nəticəsində mühazirə təlimindən interaktiv, konstruktiv öyrənməyə keçid prosesi baş verir.

Müasir tədris və öyrənmə istiqamətində müəllimləri dəstəkləyən "Chevron-Xəzər" və "Mədəd-Azərbaycan" onların peşəkarlıq səviyyələrinin inkişafı məqsədilə Bakı şəhərində və dörd rayonda yeni təşəbbüsün həyata keçirilməsinə başlamışdır. "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" ilə sıx əlaqədə həyata keçirilən layihə siniflərdə texnologiya və elektron resursların səmərəli istifadəsi üzrə müəllimlər üçün təlimlər nəzərdə tutur. Təşəbbüsün davamlılığını təmin etmək üçün layihədə iştirak edən məktəblərdə həmkar təlimçilər şəbəkəsi yaradılacaq və bu şəbəkə vasitəsilə müəllimlərlə iş davam etdiriləcək.

Layihədə Bakı şəhərindən, Bərdə, Goranboy, Yevlax və Ucar rayonlarından 1000 nəfər müəllimin iştirakı nəzərdə tutulub. Müəllimlər "Müəllimlərin peşəkarlıq səviyyəsinin təkmilləşdirilməsi", "İntel"in "Gələcək üçün təhsil" və "Microsoft"un "Həmkara dəstək" proqramları əsasında təşkil edilmiş təlimlərdə iştirak edəcəklər. Layihənin nəticəsi olaraq iştirakçılar tədris prosesinin keyfiyyətini təmin etmək üçün müasir yanaşmalar, təhsil texnologiyaları və elektron  təhsil  resursları  üzrə təcrübi bilik və bacarıqlarını artıracaqlar. 

Hicran ƏKBƏROVA