İsveçin Upsala Universitetinin beynəlxalq əlaqələr, hüquq və siyasi elmlər ixtisasları üzrə təhsil alan bir qrup tələbəsi Xəzər Universitetində olmuşlar.

Xəzər Universitetindən AzərTAc-a bildirmişlər ki, universitetlə yaxından tanış olan tələbələr daha sonra bu ali təhsil müəssisəsinin bir qrup müəllimi ilə görüşmüşlər. Görüşün məqsədi yerli hüquq və qanunvericilik, eləcə də Azərbaycan Konstitusiyası ilə bağlı onları maraqlandıran sualları araşdırmaq idi.

Görüşdə humanitar və sosial elmlər fakültəsinin dekanı, dosent Cabir Xəlilov, Hüquq departamentinin müəllimi Leyla Məmmədova, Siyasi elmlər və beynəlxalq münasibətlər departamentinin müəllimi Baba Bayramlı və Beynəlxalq əlaqələr departamentinin nümayəndəsi Aytən Şadlinskaya iştirak etmiş, tələbələri maraqlandıran sualları cavablandırmışlar.