Ulu öndər Heydər Əliyevin anadan olmasının 89-cu ildönümü münasibətilə Naxçıvan Özəl Universitetinin pedaqoji fakültəsinin tarix-ictimaiyyat ixtisası üzrə I kurs tələbələri Heydər Əliyev muzeyində ekskursiyada olmuşlar. Muzeyin direktoru Ramin Orucəliyev ulu öndərin keçdiyi mənalı ömür yolu haqqında tələbələrə ətraflı məlumat vermişdir. Bildirilmişdir ki, ümummilli liderimiz Heydər Əliyev Azərbaycan xalqının tarix boyu yetişdirdiyi nadir şəxsiyyətlərdən biri olaraq bu gün də milyonlarla insanın qəlbində yaşayır. Həyatının mənasını xalqa və dövlətə xidmətdə görən ulu öndərimiz bu müqəddəs amal uğrunda ən çətin sınaqlara mərdliklə sinə gərən millət fədaisi kimi daim böyük ehtiramla, rəğbətlə xatırlanır. Böyük tarixi missiyaları yerinə yetirmək qüdrətinə malik olan dahi şəxsiyyətlər arasında ümummilli liderimiz Heydər Əliyevin müstəsna yeri var. Çünki onun adı Azərbaycan xalqının lideri kimi müasir tariximizə əbədi həkk olunmuşdur. Əbədiyaşar şəxsiyyət olan ulu öndərin əməlləri, işıqlı ideyaları bu gün də ölkəmizi inkişaf etdirir. Ulu öndər Azərbaycanı hər zaman sevərək hifz etmiş, ölkəmizin müstəqilliyi naminə heç nədən  çəkinməmişdir. Ümummilli lider elə bir şəxsiyyət idi ki, onun siyasi fəaliyyətinin araşdırılmasına həmişə ehtiyac duyulacaqdır. Çünki Heydər Əliyev ölkəmizin düşdüyü ən ağır vaxtlarda xalqının köməyinə çatmış, gördüyü böyük işlərlə hər bir azərbaycanlının qəlbində əbədi yaşamaq hüququ qazanmışdır. Azərbaycan xalqı ona görə xoşbəxtdir ki, bu əməllər, bu ideyalar ulu öndərin siyasi kursunun layiqli davamçısı olan ölkə başçısı İlham Əliyev tərəfindən uğurla davam etdirilir. Ulu öndərin əməlləri davam etdirildikcə, ideyaları gerçəkləşdikcə Azərbaycan daha qüdrətli bir dövlətə çevrilir.

Tələbələrin muzeyə ekskursiyaları may ayının 8-dək davam etdiriləcəkdir. Bu müddət ərzində muzeydə dərs saatlarının da keçirilməsi nəzərdə tutulub.  

Nuray ƏSGƏROVA