Gənclər və İdman Nazirliyinin sektor müdiri Elşən Hüseynovdan aldığımız məlumatda bildirilir ki, aprelin 23-də Bakıda ölkəmizdə təhsil alan əcnəbi tələbələr arasında Azərbaycan tarixi və coğrafiyası üzrə birinci respublika intellektual olimpiadası keçirildi. Bu maraqlı tədbirin keçirilməsində əsas məqsəd respublikada fəaliyyət göstərən ali məktəblərdə təhsil alan əcnəbi tələbələrin Azərbaycanın tarixi və coğrafiyası haqqında məlumatlandırılması, onlar arasında maarifləndirmə işinin genişləndirilməsi və həmçinin asudə vaxtın səmərəli təşkil edilməsi idi.

Yarışda Azərbaycanın 12 ali təhsil müəssisəsindən 48 tələbə iştirak edirdi.

Olimpiadada Türkiyə, Moldova, İran, Koreya, Gürcüstan və digər ölkələrdən olan əcnəbi gənclər qələbə uğrunda mübarizə aparırdı.

Bu intellektual olimpiadada Bakı Slavyan Universiteti I, Azərbaycan Memarlıq və İnşaat Universiteti II, Qafqaz Universiteti isə III yerlərə layiq görüldülər.

Qaliblərə Gənclər və İdman Nazirliyinin diplomları və xatirə hədiyyələri təqdim edildi. Yarışın qalan iştirakçılarına isə sertifikatlar, xatirə hədiyyələri və stolüstü Azərbaycan bayraqları verildi. 

ƏDALƏT