Azərbaycan
Respublikasının Təhsil Nazirliyi "Ali təhsil və cəmiyyət"
adlı yeni elmi-metodik jurnal təsis edib. Jurnalın
nəşrində məqsəd ali təhsildə aparılan islahatların, bu
sahədə baş verən yeniliklərin cəmiyyətə daha dolğun
şəkildə çatdırılmasıdır.
Məlum olduğu kimi, cəmiyyətin ahəngdar inkişafında, onun
intellektual potensialının formalaşmasında, maddi
sərvətlərin insan kapitalına çevrilməsində təhsil,
xüsusən də ali təhsil mühüm rol oynayır. Hər bir ölkənin
tərəqqisi, ilk növbədə, həmin ölkədə təhsilin inkişafı
ilə bağlıdır. Məhz təhsil prosesində insan yeni bilik və
bacarıqlar əldə edir, iqtisadiyyatın məhsuldar qüvvəsinə
- insan kapitalına çevrilir. Tədqiqatlar sübut edir ki,
təhsilə əsaslanan insan kapitalı ölkə üçün ən qiymətli
resurs olmaqla təbii sərvətlər və maliyyə resurslarından
daha əhəmiyyətlidir. İqtisadiyyatın beynəlxalq
rəqabətqabiliyyətliliyini təmin edən insan kapitalının
formalaşdırılması isə milli təhsil sisteminin, o
cümlədən bu sistemin aparıcı həlqəsi olan ali təhsilin
əsaslı şəkildə modernləşdirilməsini tələb edir. Ona görə
də ali təhsilin modernləşdirilməsi, bu sahədə həyata
keçirilən islahatların daha da sürətləndirilməsi hazırda
ölkə qarşısında duran mühüm vəzifələrdən biri hesab
olunur.
Diqqətəlayiq haldır ki, son illər ali təhsilin daha da
inkişaf etdirilməsi istiqamətində mühüm addımlar
atılmaqda, bir sıra dövlət proqramları və layihələr
həyata keçirilməkdədir. Ölkəmiz 2005-ci ildə Boloniya
prosesinə qoşulduqdan sonra Avropa təhsil məkanına
inteqrasiya sürətlənmişdir. Azərbaycan öz ali təhsil
sisteminin inkişaf prioritetlərini dünyada, o cümlədən
Avropa təhsil məkanında gedən proseslərə inteqrasiya
olunmaqla müəyyənləşdirmişdir. Hazırda ali təhsil
sahəsində həyata keçirilən islahatların əsas
istiqamətini də məhz bu prinsip təşkil edir.
Ali təhsil sahəsində dünyada özünü göstərən inkişaf
tendensiyalarının, islahat təcrübələrinin, ölkəmizdə ali
təhsilin modernləşdirilməsi istiqamətində atılan
addımların ictimaiyyətə vaxtında və daha dolğun şəkildə
çatdırılması yeni jurnalın nəşrini zəruri etmişdir.
İlk nömrəsi bu günlərdə çapdan çıxmış "Ali təhsil və
cəmiyyət" jurnalında ali təhsil problemlərinə, onun
cəmiyyətdəki roluna həsr olunmuş fundamental və tətbiqi
araşdırmaları, pedaqoji, psixoloji, metodik məsələləri
əhatə edən, ali təhsilin inkişafına xidmət göstərən
elmi-metodik məqalələrin dərci nəzərdə tutulmuşdur.
Jurnalda ali təhsil sahəsində aparılan islahatların
gedişinə, bu sahədə mütəxəssis və müəllimlərin iş
təcrübəsinə, elmi tədqiqatların nəticələrinin təhsil
prosesinə tətbiqinə, Boloniya prosesi çərçivəsində ali
təhsilin Avropa məkanına inteqrasiyası ilə bağlı yeni
məlumatlara, yerli və beynəlxalq təcrübə haqqında son
materiallara geniş yer ayrılacaq, ali təhsil sahəsində
dünyanın tanınmış mütəxəssislərinin yazıları dərc
ediləcəkdir.
Oxucular jurnalın səhifələrində habelə yeni dərslik və
dərs vəsaitləri, ali təhsil sahəsində aparılan
eksperimentlərin təşkili, gedişi və nəticələri, ali
təhsil problemlərinə həsr olunmuş "dəyirmi masa"lar,
müzakirə və treninqlər, tələbə elmi cəmiyyətləri,
gənclər təşkilatlarının fəaliyyəti, konfrans və
seminarlar, ali təhsilin informasiyalaşdırılması,
kompüterləşdirilməsi və pedaqoji innovasiyalar haqqında
dəqiq və ətraflı məlumat ala biləcəklər.
Ali təhsillə bağlı oxucuları maraqlandıran suallara
cavab vermək üçün jurnalda "hüquqi xidmət" rubrikasının
açılması planlaşdırılıb.
İldə 4 dəfə oxucularla görüşə gələcək jurnalda məqalələr
Azərbaycan, ingilis və rus dillərindən birində qəbul və
dərc olunacaq, yazıldığı dildən asılı olmayaraq hər
birinin 3 dildə qısa annotasiyası veriləcəkdir.
Jurnalın baş redaktoru Azərbaycan Respublikasının təhsil
naziri, fizika-riyaziyyat elmləri doktoru, professor,
əməkdar elm xadimi Misir Mərdanovdur. Yeni nəşrin
redaksiya heyətinə Təhsil Nazirliyinin və TQDK-nin
rəhbər işçiləri, ali məktəb rektorları, tanınmış alimlər
və təhsil təşkilatçıları, bir sıra xarici ölkə
universitetlərinin təmsilçiləri, ali təhsil ekspertləri
daxildir.
Qeyd etdiyimiz kimi, jurnalın ilk nömrəsi artıq
oxucuların ixtiyarına verilmişdir. Nömrə ümummilli
liderimiz Heydər Əliyevin və ölkə Prezidenti İlham
Əliyevin təhsilin əhəmiyyəti barədə dedikləri sözlərlə
açılır. İlk səhifələrdə həm də baş redaktorun oxuculara
müraciəti çap olunmuşdur.
Jurnal aparıcı rubrikası olan "Ali təhsilin müasir
prioritetləri" rubrikası altında təhsil naziri cənab
Misir Mərdanovun "Cəmiyyətin formalaşmasında ali
təhsilin rolu", Azərbaycan Respublikasının Prezidenti
yanında Dövlət İdarəçilik Akademiyasının rektoru,
akademik Urxan Ələkbərovun "Davamlı inkişafdan ekoloji
sivilizasiyaya: ali təhsil və əmək bazarı", Azərbaycan
Turizm İnstitutunun rektoru Cəfər Cəfərovun "Cəmiyyətin
elitası ali məktəbdə formalaşır", Azərbaycan Dövlət
Pedaqoji Universiteti kompüter mərkəzinin direktoru
İlham Əhmədovun "Ali təhsildə qlobal tendensiyalar,
dəyişən paradiqmalar" məqalələrini və bir sıra digər
yazıları oxuculara təqdim etmişdir.
Jurnalın daimi rubrikalarından biri kimi nəzərdə tutulan
"Ali təhsil: elm və iqtisadiyyat" rubrikasında isə
Azərbaycan Respublikası Vergilər Nazirliyinin Vergi
siyasəti və strateji araşdırmalar Baş idarəsinin rəisi,
AMEA-nın müxbir üzvü Akif Musayevin dövlətin innovasiya
sisteminin inkişafı məqsədi ilə dövlət, elm və biznesin
qarşılıqlı əlaqəsinə, Dünya Bankının ali təhsil üzrə
koordinatoru, "Ali təhsil və cəmiyyət" jurnalının
redaksiya heyətinin üzvü Cəmil Səlminin cəmiyyətin
müxtəlif sosial təbəqələrindən olan gənclərin ali təhsil
almaq imkanları üzrə aparılmış təhlilin nəticələrinə,
BDU-nun tədrisin təşkili və təlim texnologiyaları üzrə
prorektoru İradə Əliyevanın müstəqillik illərində ali
məktəb elminin inkişafı və elmi-pedaqoji kadrların
hazırlanmasına həsr olunmuş məqalələri dərc edilmişdir.
İlk nömrədə habelə "Ali təhsildə keyfiyyət", "Ali
təhsildə pedaqoji problemlər", "Ali məktəb həyatından"
rubrikaları altında da oxuculara maraqlı məqalələr
təqdim olunmuşdur.
Üzərinə ali təhsildə gedən islahatlara və ali
məktəblərdə görülən işlərə ayna tutmaq, müsbət
təcrübələri təbliğ etmək və maarifləndirmə işləri görmək
kimi şərəfli bir missiya götürmüş "Ali təhsil və
cəmiyyət" jurnalının nəşrə başlaması münasibəti ilə
təhsil ictimaiyyətimizi təbrik edir, jurnalın yaradıcı
kollektivinə uğurlar arzulayırıq.
Yusif ƏLİYEV |