Aprelin 16-da Bakıdakı 132-134 nömrəli Təhsil Kompleksində Avropa Şurasının "Uşaqlara qarşı zorakılıq" proqramı çərçivəsində "Biz zorakılığa yox  deyirik!" mövzusunda tədbir keçirilb.  Azərbaycan Respublikasının Milli Məclisi, Səbail Rayon İcra Hakimiyyəti və  Bakı Şəhəri üzrə Təhsil İdarəsi tərəfindən təşkil olunmuş  tədbirdə parlamentin deputatları, təhsil işçiləri, şagirdlər və beynəlxalq qurumların nümayəndələri və Avropa Şurası baş katibinin Azərbaycandakı xüsusi nümayəndəsi Konstantin Yerokostopulos  iştirak edib.

Tədbirdə Səbail Rayon İcra Hakimiyyətinin başçısı Asif Əsgərov bəşəriyyətin gələcəyi olan uşaqlara diqqət və qayğının əhəmiyyətindən danışıb. O, Azərbaycanda uşaqlarla bağlı siyasətin əsasının ümummilli lider, dahi şəxsiyyət Heydər Əliyev tərəfindən qoyulduğunu   deyib. Bildirilib ki, ulu öndər Heydər Əliyevin təşəbbüsü ilə  respublikamızda 1999-cu ildə BMT-nin "Uşaq hüquqları haqqında" Konvensiyasının müddəalarını özündə əks etdirən "Uşaq hüquqları haqqında" Qanun qəbul edildi və Prezident İlham Əliyev tərəfindən 2009-cu il ölkəmizdə "Uşaq ili" elan olundu.  Natiq həm də  Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə uşaqlarla bağlı reallaşdırılan layihələrin əhəmiyyətindən  danışıb.

Milli Məclisin Beynəlxalq münasibətlər və parlamentlərarası əlaqələr komitəsinin sədr müavini, müvafiq proqramın Azərbaycan üzrə əlaqələndiricisi Sevinc Fətəliyeva isə müasir dünyada uşaq hüquqlarının qorunmasının vacibliyindən, ölkəmizdə bu sahədə həyata keçirilən tədbirlərdən  bəhs edib.

Tədbirdə  şagirdlərin "Uşaqların müasir cəmiyyətdə rolu", "Ailə münasibəti: valideynlər və uşaqlar" və digər mövzularda maraqlı məruzələri dinlənilib.

Sonra Milli Məclisin deputatları Gülər Əhmədova, Elmira Axundova, YUNİSEF-in Azərbaycan üzrə nümayəndəliyinin uşaq müdafiəsi şöbəsinin müdiri Munir Məmmədzadə və digər qonaqlar  uşaq hüquqlarının qorunması  ilə  əlaqədar   fikirlərini  bildiriblər. 

Şakir CƏFƏROV