Bakıdakı Y.Kovalyov  adına  229 nömrəli tam orta məktəbdə 9 may Qələbə Günü münasibətilə müharibə veteranları ilə görüş keçirilib.  

Tədbirdə  məktəb kollektivi ilə yanaşı 1941-1945-ci illər Böyük Vətən Müharibəsində həlak olanların qohumları, müharibə veteranları, rayon ağsaqqalları, KİV nümayəndələri  və digər qonaqlar iştirak ediblər.

Əvvəlcə Dövlət bayrağı səhnəyə gətirilib. Sonra şagirdlərin ifasında Dövlət himni səslənib. Vətənimizin azadlığı uğrunda canlarından keçmiş igid oğulların xatirəsi bir dəqiqəlik sükutla yad edilib.

Tədbiri giriş sözü ilə açan məktəbin direktoru Fəridə Bağırova  1941-1945-ci illərdə sovet ordusu tərkibində Azərbaycan oğullarının göstərdikləri şücaətlərindən və qəhrəmanlıqlarından danışıb.

Şagirdlər Vətənə aid şeirlər söyləyib, mahnılar ifa edib və  ədəbi kompozisiya göstəriblər. Çıxış edən veteranlar müharibə illərinin ağrı-acılarından danışaraq xalqımıza sülh və əmin-amanlıq arzu ediblər. Belə tədbirlərin təhsil ocaqlarında keçirilməsi təqdirəlayiq hal kimi qiymətləndirilib.

Tədbirin sonunda müharibə illərində çəkilmiş film göstərilib. Veteranlar məktəb kollektivi ilə xatirə şəkli çəkdiriblər.  

Rəşad ZİYADOV