Bu günlərdə Azərbaycan Dillər Universitetində mülki müdafiə kafedrasının baş müəllimi Sədaqət Musayevanın təşkilatçılığı ilə "Sağlam həyat tərzi gənclərin gözü ilə" mövzusunda tədbir keçirildi. Tədbirdə   Nazirlər Kabinetinin, Təhsil Nazirliyinin, Ailə, Qadın və Uşaq Problemləri üzrə Dövlət Komitəsinin, Regional Psixologiya Mərkəzinin  nümayəndələri  və universitetin tələbə-müəllim heyəti iştirak edirdi.

ADU-nun tərbiyə işləri üzrə prorektoru Ələddin Əliyev çıxış edərək gənclərin sağlam həyat tərzinin formalaşmasına dövlət tərəfindən daim diqqət və qayğı göstərildiyini bildirdi.  Tələbələrin sağlam həyat tərzinə uyğunlaşması istiqamətində belə tədbirlərin əhəmiyyətindən danışan Ə.Əliyev maarifləndirmə işinin bu sahədə önəmli rol oynadığını diqqətə çatdırdı. Zərərli vərdişlərin yayılmasının qarşısının alınması istiqamətində keçiriləcək tədbirlərlə bağlı Nazirlər Kabinetinə müraciət edildiyi  və bu təşəbbüsə dəstək verildiyi qeyd edildi.

Sonra 1 saylı İngilis dili və regionşünaslıq və beynəlxalq münasibətlər fakültəsinin tələbələrinin ifasında "İtirilmiş həyatlar" adlı tamaşa nümayiş etdirildi.

Gənclərin üzləşdiyi problemlərin obrazlı şəkildə canlandırılmasını yüksək qiymətləndirən Regional Psixologiya Mərkəzinin psixoloqu Mehriban Qafarova  bu kimi tədbirlərin psixoloji tərbiyə mühitində önəmli rol oynadığını vurğuladı.

Təhsil Nazirliyinin baş məsləhətçisi Elnur Əlizadə  çıxışında zərərli vərdişlərlə mübarizədə ADU-nun tələbələrinin yenilikçi ideyalarının təsiredici xarakterə malik olduğunu bildirdi. Yeni maarifləndirmə üsullarının ənənəvi metodlardan daha  effektiv olduğu tədbir iştirakçılarının diqqətinə çatdırıldı.  

Tədbir diskussiya ilə başa çatdı. 

Şakir CƏFƏROV