2003-cü ildə ulu öndər Heydər Əliyev yeni məktəblərin, mövcud məktəblərə əlavə korpusların tikintisi və əsaslı təmiri üzrə Dövlət Proqramının qəbul edilməsi ilə bağlı sərəncam imzaladı. Bu sərəncamdan sonra ölkədə məktəb tikintisi geniş vüsət almağa başladı.

Ulu öndərin siyasətini uğurla davam etdirən ölkə Prezidenti cənab İlham Əliyevin hakimiyyətə gəldiyi vaxtdan məktəb tikintisinə diqqət daha da artırıldı. 2003-2008-ci illərdə  cənab Prezidentin diqqət və qayğısı sayəsində respublikada  300 min yerlik 1360 yeni məktəb binası tikilib istifadəyə verildi. Həmin məktəblərdən biri də Hacıqabul şəhər 8 nömrəli humanitar fənlər təmayüllü məktəb-liseydir.

15 sentyabr 2008-ci ildə fəaliyyətə başlayan bu məktəb-lisey çox gənc olmasına baxmayaraq, verdiyi təhsilin səviyyəsinə, bütün təlim-tərbiyə işlərinin keyfiyyətli təşkilinə, şagirdlərin hazırlığına görə rayonun qabaqcıl məktəblərindən hesab olunur.

Məktəbin müəllimləri müasir dərs üsullarını və yeni texnologiyaları daha dərindən öyrənir, onları dərslərində tətbiq etməyə çalışırlar. Məktəbdə təhsilin keyfiyyətini daha da yüksəltmək  məqsədilə nümunəvi dərslər, dərs dinləmələr, bilik yarışları keçirilir.

Məktəbin şagirdləri hər il istər rayon, istərsə də respublika səviyyəli inşa müsabiqələrində, fənn yarışmalarında fəal iştirak edirlər. Belə ki, məktəbin məzunu Aysel Ələkbərova 2010-2011-ci tədris ilində "Gələcək nəsillərlə üz-üzə"  III ümumrespublika inşa müsabiqəsinin qalibi olmuşdur. Məktəbin yetirmələri respublika fənn olimpiadalarında  da artıq öz bilik  və bacarıqları  ilə  fərqlənirlər.

2009-2010-cu tədris ilində Aysel Ələkbərova respublika fənn olimpiadasında tarix fənni üzrə, 2010-2011-ci tədris ilində isə biologiya fənni üzrə həvəsləndirici yerlərə layiq görülmüşdür.

2011-2012-ci tədris ilində gənc məktəb daha böyük uğurlara imza atdı. Məktəbin iki şagirdi - Aydın Şükürlü respublika fənn olimpiadalarında tarix fənni üzrə III yerə, Şirin Mehdiyeva isə kimya fənni üzrə həvəsləndirici yerə layiq görüldülər.

Məktəblilər hərbi-vətənpərvərlik istiqamətində keçirilən idman oyunlarında, idmanın müxtəlif növləri üzrə rayon və respublika turnirlərində, yarışlarda böyük uğurla çıxış edirlər.

2008-2009-cu tədris ilində "Şahin" hərbi-idman oyunlarının zona turunda II yerə layiq görülmüş məktəbin komandası respublika final yarışlarında iştirak etmək hüququ qazanmış, həmin mərhələdə də uğurlu iştirakına görə Təhsil Nazirliyinin diplomu ilə təltif edilmişdir.

Məktəb 2011-2012-ci tədris ilində rayonda keçirilən "Azərbaycan dili və ədəbiyyat" aylığı çərçivəsində sinifdənxaric işlər üzrə I yerə layiq görülmüşdür.  

Y.MƏMMƏDOVA,
Hacıqabul şəhər 8 nömrəli humanitar fənlər təmayüllü məktəb-liseyin
Azərbaycan dili və ədəbiyyat müəllimi