Xudat şəhər N.Nərimanov adına 2 nömrəli tam orta məktəbdə ulu öndər Heydər Əliyevin əziz xatirəsinə həsr olunmuş tədbirlər keçirmək bir ənənə halını alıb. Elə bu günlərdə məktəbin  direktor müavinləri Sevda İskəndərova və Cabir Ələkbərovun rəhbərliyi ilə bir qrup şagirdimizin Bakı şəhərinə etdiyi ekskursiya da müstəqil Azərbaycan dövlətinin banisi və qurucusu, ümummilli lider Heydər Əliyevin anadan olmasının 89-cu ildönümünə həsr olunub.

Şagirdlər əvvəlcə Fəxri xiyabana gedərək ümummilli lider Heydər Əliyevin və görkəmli oftalmoloq alim, akademik Zərifə Əliyevanın məzarları önünə tər çiçəklər düzərək xatirələrini ehtiramla yad ediblər. Onlar dünya şöhrətli bu insanı xatırlayaraq bir daha yəqin ediblər ki, ulu öndərin bütün fəaliyyətinin, atdığı addımların mahiyyəti yalnız xalqına xidmət etmək arzusundan doğurdu. İşıqlı gələcəyimiz naminə ulu öndərin zəngin irsini öyrənmək, onun əbədiyaşar ideyalarına sədaqətlə əməl etmək hər birimizin borcudur...

Sonra şagirdlər  Şəhidlər xiyabanında uyuyan Vətən oğullarımızın məzarlarını ziyarət etmiş, iki dəfə Sovet İttifaqı Qəhrəmanı, general Həzi Aslanovun, turk əsgərlərinin şərəfinə ucaldılmış abidələri önünə tər çiçəklər qoyublar. Məktəblilər Dağüstü parkdan "Eurovision-2012" kompleksini seyr ediblər. Eyni zamanda onlar anbaan, günbəgün gözəlləşən Bakının tarixi abidələrini, görməli yerlərini də gəziblər.  

Nəzakət KƏRİMOVA,
Xudat şəhər N.Nərimanov adına
2 nömrəli tam   orta məktəbin müəllimi