Bu günlərdə Azərbaycan Müəllimlər İnstitutunun Quba filialında "Müasir təlim texnologiyaları və dayaq məntəqələrində işin təşkilinin təkmilləşdirilməsi səmərəliliyinin artırılması" mövzusunda elmi-praktik konfrans keçirilib.

Tədbirdə Xaçmaz, Şabran, Quba və Qusar RTŞ-nin əməkdaşları, dayaq məntəqə rəhbərləri, qabaqcıl müəllimlər iştirak ediblər.

Konfransı giriş sözü ilə AMİ-nin Quba filialının əlavə təhsil üzrə direktor müavini Nurbala Süleymanov açaraq dayaq məntəqələri barədə məlumat verərək onun pedaqoji və metodiki istiqamətlərindən danışıb.

Sonra riyaziyyat üzrə fəlsəfə doktoru Əmirağa Şıxəmmədov "Əlavə təhsilin təşkilində dayaq məntəqələrində aparılan işin forma və məzmunu", əlavə təhsilə xidmət edən kabinetin müdiri Nübar Bayramova "Milli Kurikulumun tətbiqində ixtisasartırma kurslarının rolu", biologiya üzrə fəlsəfə doktoru Baba Cəfərov "Tədrisin səmərə və keyfiyyətinin yüksəldilməsində interaktiv təlimdən istifadə" mövzularında çıxış ediblər.

Dayaq məntəqə rəhbərləri  bu sahədə öz iş təcrübələrindən təqdimatlar ediblər. Müəllimlərin peşəkarlıq fəaliyyətinin yüksəldilməsində, ibtidai siniflərdə interaktiv təlim metodlarının tətbiqində, ədəbiyyat, riyaziyyat, fizika, tarix, biologiya dərsliklərində müasir təlim texnologiyalarından istifadə olunmasında dayaq məntəqələrinin roluna dair iş təcrübələri dinlənilib, irəli sürülmiş rəy və təkliflər nəzərə alınıb.       

ƏDALƏT