Dövlət Dəmir Yolu Liseyi 1923-cü ilin  mart ayında dəmiryolçular məktəbi kimi  yaradılıb. Fəaliyyət göstərdiyi müxtəlif dövrlərdə dəfələrlə adı dəyişilsə də, məktəbin profili olduğu kimi qalıb. Lisey 1967-ci ildən Azərbaycan Dövlət Dəmir Yolu ilə yanaşı, Bakı Metropoliteni üçün də ixtisaslı kadrlar hazırlamağa başlayıb. İndiyə kimi  40 minə qədər məzunu olmuş liseydə   işləyən müəllim və şagirdlər dəfələrlə Çexiya, Polşa Bolqarıstan, Ukrayna və Rusiya Federasiyasında təcrübə mübadiləsində olaraq öz bilik və  bacarıqlarını artırmışlar.

Liseyin direktoru, əməkdar mühəndis Fərrux  Abbasov bildirdi   ki, rəhbərlik etdiyi pedaqoji kollektiv  yeni-yeni  uğurlara imza atmaq üçün səylə çalışır.  Artıq lisey  Rusiya Federasiyasının Buryatiya Respublikasının paytaxtı Ulan-Ude şəhərindəki 1 nömrəli peşə liseyi ilə əməkdaşlıq haqqında müqavilə  bağlayıb.  Nəticədə təhsil ocağında ixtisaslı kadrların keyfiyyətinin yüksəldilməsi sahəsində ciddi  işlər gedir. Bu gün liseydə şagirdlər stansiya köməkçisi, elektrovozun və  metropolitenin maşinist köməkçisi ixtisaslarına həvəslə yiyələnirlər. Həm də pedaqoji kollektiv növbəti ildə Dəmir Yolu  Liseyinin 90 illiyini  yüksək səviyyədə  qeyd  etmək üçün hazırlıq işlərinə  başlayıb.  

Şakir CƏFƏROV