Vaxtilə böyük alim Azad Mirzəcanzadənin təşəbbüsü ilə Bakıdakı 147 nömrəli texniki-humanitar liseydə keçirilməyə başlanmış şagird elmi konfransları artıq çoxdan bu təhsil ocağının yaxşı bir ənənəsinə çevrilib. Şagirdləri elmi tədqiqatlara həvəsləndirmək, onlarda ilkin tədqiqatçılıq bacarıq və vərdişləri formalaşdırmaq məqsədi daşıyan elmi konfransları liseydə iki ildən bir keçirilir. Elmi tədqiqatlara həvəsləri, maraqları olan, gələcəkdə özlərini elmdə görməyi arzulayan şagirdlər müəllimlərinin rəhbərliyi altında müxtəlif fənlərdən hazırladıqları elmi məruzələrlə tanınmış alimlər qarşısında çıxışlar edir, bir növ hesabat verirlər.

Liseydə növbəti belə konfrans "Elmin zirvəsini fəth edək" devizi altında aprelin 23-də keçirildi. Hər elmi konfransda olduğu kimi, bu dəfə də liseyin müəllim və şagirdlərinin təşəbbüsü və bilavasitə iştirakı ilə Azərbaycanın bölgələrinə aid guşələr yaradılmış, hər guşədə ona həsr olunduğu bölgənin təbii-coğrafi xüsusiyyətləri, flora və faunası haqqında, faydalı qazıntılarına, əsas təsərrüfat sahələrinə dair məlumatlar və müvafiq nümunələr yerləşdirilmişdi. Konfrans iştirakçıları bu guşələrin önündə ayaq saxlayıb onlara maraqla tamaşa edirdilər.

Tədbiri giriş sözü ilə açan 147 nömrəli texniki-humanitar liseyin direktoru, əməkdar müəllim Həlimə Mehdiyeva konfransın ulu öndər Heydər Əliyevin anadan olmasının 89-cu ildönümünə həsr olunduğunu diqqətə çatdırdı. Bildirdi ki, dil-ədəbiyyat, tarix, riyaziyyat, təbiət elmləri, kimya-biologiya, xarici dil və s. bölmələri əhatə edən konfransda VIII-XI sinif şagirdlərinin elmi məruzələri dinlənilib müzakirə olunacaq.

Liseyin bir qrup şagirdi Dövlət himnimizi ifa etdikdən sonra H.Mehdiyeva çıxışını davam etdirərək, son illər əldə etdikləri uğurlar barədə məlumat verdi. Söylədi ki, görkəmli alim Azad Mirzəcanzadənin təşəbbüsü, Təhsil Nazirliyi və Xətai Rayon İcra Hakimiyyətinin birgə sərəncamı ilə yaradılmış liseylərinə qəbul V sinifdən yoxlama yolu ilə aparılır.

Liseydə respublikanın bütün bölgələrindən qabiliyyətli şagirdlər təhsil alır. Tədris ocağının nəticələri kifayət qədər yüksəkdir. Belə ki, TQDK-nın hər il qəbul imtahanlarının nəticələrinə əsasən müəyyənləşdirdiyi respublikanın 10 ən yaxşı ümumtəhsil müəssisəsi arasında 147 nömrəli texniki-humanitar liseyin də adı vardır. 460 nəfər şagird kontingenti olan liseydə yüksək peşəkarlığa malik müəllimlər çalışır. Müəllimlər arasında elmlər doktoru, professor, müxtəlif elmlər üzrə fəlsəfə doktorları, "Ən yaxşı müəllim" müsabiqəsinin qalibləri vardır.

Liseyin demək olar ki, bütün məzunları ölkəmizin və xarici dövlətlərin ən nüfuzlu universitetlərinə qəbul olunur və müvəffəqiyyətlə təhsil alırlar. Liseyin istedadlı şagirdləri elmi konfransın iştirakçılarını şeir və mahnılardan ibarət ədəbi-bədii kompozisiya ilə salamladıqdan sonra qonaqlar qruplara bölünüb bölmələrdə iştirak etdilər. Hər bölmədə 4-5 məruzə dinlənildi.

Bizim də iştirak etdiyimiz ədəbiyyat bölməsində öncə liseyin təlim-tərbiyə işləri üzrə direktor müavini Aynur Nəbiyeva  elmi konfransa hazırlıq, bu işdə xüsusi fəallıq göstərən, şagirdlərin elmi rəhbəri olmuş müəllimlər barədə məlumat verdi.

Söz şagirdlərə verildi. VIII "a" sinif şagirdi Şahin Əhmədov "Nizami və Quranşünaslıq", IX "b"sinif şagirdi Elmira Sadıqova "Xəmsənin təhlili. Fənlərarası əlaqə", rus bölməsi üzrə XI "z" sinif şagirdi Səbinə Vəliyeva "Cəmiyyətdə şəxsiyyətin tragediyası" (rus dilində), X "a" sinif şagirdi Nübar Baydarova "Qədim türk - oğuz yurdu "Qərbi Azərbaycanda (indiki Ermənistan) etnotoponimlər", IX sinif şagirdi Narı Kamilli "M.Füzulinin "Leyli və Məcnun" poemasında felin xəbər şəkli" mövzularında məruzələr etdilər.

Hər  məruzədən sonra şagirdlər dinləyənlər tərəfindən onlara ünvanlanan sualları cavablandırdılar. Məruzələrin müzakirəsi zamanı çıxış edən Atatürk Mərkəzinin rəhbəri, Milli Məclisin mədəniyyət komitəsinin sədri, AMEA-nın müxbir üzvü, professor Nizami Cəfərov, Bakı Şəhəri üzrə Təhsil İdarəsi müdirinin müavini Məhəmməd Bayramov, BDU-nun kafedra müdiri, professor Cəlil Həsənov,  AMEA Kosmik Tədqiqatlar İnstitutunun direktor müavini, professor Tofiq Süleymanov, "Azərbaycan məktəbi" jurnalının baş redaktoru, filologiya üzrə fəlsəfə doktoru Nəcəf  Nəcəfov, "İki sahil" qəzetinin baş redaktoru Vüqar Rəhimzadə və başqaları elmi məruzələr üçün fərqli və aktual mövzuların seçildiyini, mövzuların kifayət qədər mükəmməl işləndiyini, məruzələrdə orijinal fikirlərin çox olduğunu, bütövlükdə konfransın yaxşı təşkil olunduğunu qeyd etdilər, şagirdlərə bəzi məsləhət və tövsiyələrini verdilər. Digər bölmələrdə də müvafiq müzakirələr aparıldı. 

Yusif ƏLİYEV