Rüfət
Adil oğlu Abbasov idmanın kikboksinq və uşu-sanda
karate növü üzrə 30 kq çəki dərəcəsində Azərbaycan
çempionudur. O, 1999-cu ildə Bakıda anadan olub. Kiçik
yaşlarından idmana böyük sevgisi olan Rüfət Bakının
Sabunçu rayonundakı Rixard Zorge adına 90 nömrəli tam
orta məktəbin VI sinif şagirdidir. Karate ilə doqquz
yaşından məşğul olur. Altıqat dünya və üçqat Avropa
çempionu olan təcrübəli məşqçilər Aqil Qasımov və Müşviq
Hüseynovun yetirməsidir.
- Rüfət, səndə idmanın bu növünə həvəs haradan yarandı?
- Ailəmiz də mənim kimi idmanı çox sevir. Onlar məni
güclü idmançı kimi görmək istəyir. Balaca vaxtı gücsüz
və zəif idim. Həmişə istəyirdim ki, mən də güclü olum.
Elə məndə idmana həvəs də belə yarandı. Qohumlarımızda
idmanla məşğul olanlar çoxdur. Uşaq yaşlarımda çox vaxt
onların yanına gedirdim. Məşqlərə həvəslə baxırdım.
Valideynlərim mənim idmanı çox sevdiyimi görüb "Lokomotiv"
klubunun kikboksinq idman növünə üzv yazdırırlar.
- Uğurların barədə bizə nə deyə bilərsən və yarış zamanı
hansı hissləri keçirirsən?
- Tatamiyə çıxanda ancaq qələbə qazanmaq haqqında
düşünürəm. Rəqibi ilk anda məğlub etmək istəyirəm.
Qarşımda duran önəmli vəzifələrdən biri Avropa və dünya
çempionu olmaqdır. Qazandığım bütün uğurlarıma görə
müəllimlərimə borcluyam. Müəllimsiz heç kim təcrübəli
idmançı ola bilməz. Yaxşı bilirəm ki, perspektivli bir
idmançı olmaq, böyük uğurlar qazanmaq üçün zəhmət çəkmək
lazımdır. Müəllimlərim mənə bu idman növünün bütün
sirlərini dərindən öyrədir. Bunun nəticəsidir ki, mən
respublikada keçirilən birinciliklərdə və Azərbaycan
çempionatlarında dəfələrlə fərqlənmişəm. Belə ki,
Gənclər və İdman Nazirliyi, Azərbaycan Sərhədçi Olimpiya
Mərkəzinin təşkilatçılığı ilə keçirilən kunq-fu sanda
idman növləri üzrə yarışlarda I yerə çıxmışam. Ümummilli
lider Heydər Əliyevin anadan olmasının 87-ci ildönümünə
həsr olunmuş yarışda I yerə layiq görülmüşəm. Salyan
rayonunda keçirilən şəhid, gizir Rafiq İsayevin
xatirəsinə həsr olunmuş yarışda və Milli Dirçəliş Günü
münasibəti ilə təşkil olunmuş çempionatda fəxri kürsüdə
yerimi qorumuşam. Azərbaycan Respublikası Silahlı
Qüvvələr və Həmrəylik gününə, Xocalı soyqırımına, Milli
Qəhrəman Mübariz İbrahimovun xatirəsinə həsr olunmuş
birinciliklərdə də mübarizə əzmimi nümayiş etdirərək
qələbələrimin sayını artırmışam. 2011-ci ildə Bakıda
13-14 yaşlı idmançılar arasında keçirilən çempionatda I
yerə çıxaraq hər birimizə müqəddəs olan üçrəngli dövlət
bayrağımızı zirvələrə qaldırmışam. Həmin ildə
Gürcüstanda keçirilən Zaqafqaziya çempionatında erməni
idmançısını məğlub edərək I yerə layiq görülmüşəm.
Ukraynanın Kiyev şəhərində keçirilən dünya çempionatında
da iştirak edərək II yeri tutmuşam. Ən böyük arzum
istənilən beynəlxalq yarışlarda bayrağımızı zirvələrə
qaldırmaq və himnimizi səsləndirməkdir.
Bakıdakı 90 nömrəli tam orta məktəbin direktoru
Qurbantac Qazıbəyova:
- Sevindirici haldır ki, Azərbaycan bu gün beynəlxalq
idman aləmində idman ölkəsi kimi tanınır.
İdmançılarımız çempion olanda, üçrəngli bayrağımız
dövlət himnimizin sədaları altında zirvələrə qalxanda
hər bir Azərbaycan övladı kimi mən də qürur hissi
keçirirəm.
Bu gün Rüfət kimi yetirmələrimiz Azərbaycanın idman
şərəfini qoruyaraq ölkəmizi Avropa və dünya
çempionatlarında layiqli təmsil edirlər. Rüfət haqqında
onu da deyə bilərəm ki, o, təlim və tərbiyəsi ilə
seçilən nümunəvi şagirddir. Məktəbdə keçirilən
tədbirlərdə həmişə fəallığı ilə fərqlənir. O, idman
yarışlarında və hərbi spartakiadalarda xüsusi fəallıq
göstərir. Rüfət müəllimlərinin məsləhətlərinə qulaq asan,
tapşırıqlara əməl edən bir şagird kimi özünü həmişə
doğruldur. Ona gələcək işlərində uğurlar arzulayırıq.
Rəşad ZİYADOV |