İyunun 1-də Azərbaycanın Misirdəki səfirliyində Ayn-Şəms Universitetində Azərbaycan dilini öyrənən, məzun olmuş, Azərbaycan dili üzrə imtahanlarda yüksək nəticə göstərmiş tələbələr və onların valideynləri ilə görüş keçirilmişdir.

Azərbaycanın Misirdəki səfirliyindən AzərTAc-a bildirmişlər ki, səfir Ş.Abdullayev Azərbaycan dilinə və mədəniyyətinə göstərdikləri marağa və böyük həvəslə dilimizi öyrəndiklərinə görə tələbələrə təşəkkür etmişdir. Diplomat səfirliyin bundan sonra da tələbələrə və tədris proqramının inkişafına lazımı yardım və dəstək göstərəcəyini bildirmişdir.

Səfir imtahanlarda ən yüksək nəticə əldə etmiş tələbələrin Azərbaycan ilə daha yaxından tanış olmaları üçün Gənclər və İdman Nazirliyinin xətti ilə bu ilin avqustunda ölkəmizə səfərinin təşkil ediləcəyini diqqətə çatdırmışdır.

Görüşdə tələbələrə şəhadətnamə və Azərbaycan dilini tədris edən azərbaycanşünas və türkoloq alim, doktor Əhməd Samiyə isə təşəkkürnamə verilmişdir.

Artıq iki ildən çoxdur ki, səfirliyin dəstəyi ilə Misirin Ayn-Şəms Universitetinin ədəbiyyat fakültəsində universitetin tədris proqramının tərkib hissəsi kimi Azərbaycan dili tədris olunur.

Dərs proqramı yalnız Azərbaycan dili ilə məhdudlaşmır. Tədris prosesində tələbələrə Azərbaycanın tarixi, ədəbiyyatı, mədəniyyəti, incəsənəti haqqında da məlumat verilir.