Naxçıvan Dövlət Universitetinin beynəlxalq münasibətlər və xarici dillər fakültəsində "15 iyun - Qurtuluşdan başlanan zəfər yolu" adlı elmi konfrans keçirildi.

Ali məktəbin rektoru, akademik, millət vəkili İsa Həbibbəyli  tədbiri giriş sözü ilə açaraq 1993-cü ildə ümummilli lider Heydər Əliyevin hakimiyyətə qayıdışını Azərbaycan dövlətçiliyinin xilası kimi dəyərləndirdi. Qeyd olundu ki, həmin dövrdə ölkədə baş alıb gedən özbaşınalıq və xaos artıq dözülməz həddə çatmışdı və məhz ulu öndər Heydər Əliyevin hakimiyyətə qayıdışı Azərbaycanın müstəqilliyinin əbədiliyini təmin etdi.

Daha sonra məruzələr ətrafında çıxışlar dinlənildi.

Azərbaycan tarixi kafedrasının müdiri, tarix elmləri doktoru, dosent Zəhmət Şahverdiyev "Heydər Əliyev müstəqil Azərbaycan Respublikasının qurucusudur", NDU Yeni Azərbaycan Partiyası ərazi ilk təşkilatının sədri, pedaqogika üzrə fəlsəfə doktoru, dosent Kamal Camalov "Heydər Əliyev siyasi hakimiyyətinin Naxçıvan dövrü", beynəlxalq münasibətlər kafedrasının müəllimi, tarix üzrə fəlsəfə doktoru Şamxal Məmmədov "Qurtuluşdan başlanan böyük zəfər yolu" adlı məruzələrlə çıxış etdilər.  Vurğulandı  ki, ulu öndər Heydər Əliyevin ölkə rəhbərliyinə qayıdışı müasir və müstəqil Azərbaycanın təməlini qoydu. Çıxış edənlər qeyd etdilər ki, həmin dövrdə hakimiyyətdə olan insanlar yalnız şəxsi ambisiyaları üçün mübarizə aparıblar. Məhz 15 iyun günündə ulu öndər Heydər Əliyevin qayıdışı ilə müharibə dayandırıldı, atəşkəs elan olundu və müstəqil Azərbaycanın inkişaf trayektoriyası müəyyənləşdirildi. Bu gün ulu öndərimiz tərəfindən əsası qoyulan və özündə inkişafı ehtiva edən siyasi kurs Prezident İlham Əliyev tərəfindən uğurla davam və inkişaf etdirilir.

Sonda 20 nəfər gəncə YAP üzvlük vəsiqələri təqdim olundu. 

Nərmin CƏFƏROVA