Heydər Əliyev öz məğrur səsilə dünyanın bütün dövlətlərinin ali kürsülərindən cəsarət və mərdliklə öz fikirlərini belə bəyan etdi: "Azərbaycanın müstəqilliyi dönməzdir, əbədidir. Azərbaycan  bundan  sonra  heç  zaman, heç bir dövlətin vassalı və müstəmləkəsi olmayacaqdır".

Azərbaycan Müəllimlər İnstitutunun  Şamaxı filialında ulu öndər Heydər Əliyevin xatirəsi bir daha  yad  edilərək  15 İyun - Milli Qurtuluş Gününə həsr olunmuş tədbir keçirildi. Tədbir Milli  Qurtuluş Gününə həsr olunmuş filmin nümayişi ilə başladı.

Tədbiri giriş sözü ilə AMİ-nin Şamaxı filialının direktoru, filologiya elmləri üzrə fəlsəfə doktoru T.Yusifova  açaraq bildirdi ki, 1993-cü ilin may-iyun aylarında Azərbaycan xalqı öz tarixinin ən ağır günlərini yaşayırdı. Birinci Qarabağ müharibəsində böyük itkilər, hərbi uğursuzluqlar, iqtisadi tənəzzül, dövlət rəhbərliyindəki çəkişmələr xalqın səbir kasasını daşdırırdı. O dövrki hakimiyyətin  səriştəsizliyi və iradəsizliyi üzündən xalq arasında qiyam getdikcə daha geniş miqyasda yayılaraq vətəndaş müharibəsi  xarakteri almışdı.

1993-cü il iyun ayının 15-də ulu öndərimiz Heydər Əliyev xalqın tələbi ilə Bakıya gələrək Ali Sovetin sədri vəzifəsinə seçildi. Ulu öndərin hakimiyyətə qayıdışı ilə hadisələrin gedişində həlledici dönüş baş verdi. Müdrik dövlət xadimi vətəndaş müharibəsi təhlükəsini aradan qaldırdı.

Tədbirdə filialın dosenti, tarix elmləri üzrə fəlsəfə doktoru Mayıl Alıcanov "Müstəqilliyə gedən şərəfli yol", ümumelmi fənlər kafedrasının əməkdaşlarından Sabir Ələkbərov "Qayıdışdan inkişafa  doğru", Zərifə Cavadova "Möhtəşəm qayıdış", Şasəddin Mikayılov "Müstəqilliyimiz əbədidir" mövzularında çıxış edərək Qurtuluş gününə həsr olunmuş bu bayramın əhəmiyyətindən  danışdılar. 

Tədbirdə filialın tələbələri adından I kurs tələbəsi Nərminə Hüseynova və II kurs tələbəsi Xaliq Tapdıqzadə çıxış etdilər.