Məktəblilər
arasında atletikanın kütləviliyinin artırılması və
inkişaf etdirilməsi, gənc idmançıların ustalığının
yüksəldilməsi, bacarıqlı idmançıların müəyyən edilməsi
istiqamətində Bakı Şəhəri üzrə Təhsil İdarəsinin
tabeliyində fəaliyyət göstərən 5 nömrəli
İxtisaslaşdırılmış Olimpiya Ehtiyatları Uşaq-Gənclər
Atletika Məktəbinin rolu əvəzedilməzdir. Gənc atletlərin
hərtərəfli fəaliyyət göstərmələrindən ötrü burada lazımi
şərait yaradılmışdır. Məşqlər eyni zamanda Respublika
Olimpiya Mərkəzində aparılır. İdmançıların hazırlığını
yoxlamaq məqsədilə Atletika Məktəbində vaxtaşırı sınaq
yarışları keçirilir. Şəhər və respublika miqyaslı
tədbirlərdə Məktəbin yetirmələrinin iştirakı təmin
edilir, onlar yarışlara, birinciliklərə qatılırlar.
"İdman ili" çərçivəsində Atletika Məktəbinin
təşkilatçılığı ilə Respublika Olimpiya Mərkəzində "Beynəlxalq
Qaçış Günü"nə həsr olunmuş növbəti tədbir həyata
keçirilmişdir. Açıq birincilikdə Atletika Məktəbinin
yetirmələri ilə yanaşı Sumqayıt Uşaq - Gənclər İdman
Məktəbinin və Ümid İdman Cəmiyyətinin gənc atletləri də
iştirak etmişlər. Qızlar və oğlanlar arasında top atma
yarışında Ülviyyə Cabbarova və Ülvi Məsimli, uzunluğa
tullanmada Yelena Pextereva və Sahib Əliyev (5¹-li
İOEUGAM), 60 m məsafəyə qaçışda Rəşidə Hüseynova (5¹-li
İOEUGAM) və Fuad Gülbalayev (Sumqayıt UGİM) yüksək
nəticə göstərmişdir. Estafet qaçışında da 5 nömrəli
İxtisaslaşdırılmış Olimpiya Ehtiyatları Uşaq - Gənclər
Atletika Məktəbinin yetirmələri fərqlənmişlər. Qaliblərə
diplom və hədiyyələr təqdim edilmişdir.
Rövşən TALIBOĞLU |