Türkiyə Milli Təhsil Nazirliyinin "Fateh layihəsi" çərçivəsində 2007-ci ildən etibarən reallaşan "Yenilikçi müəllimlər" proqramına uyğun olaraq Ankarada "Yenilikçi müəllimlər forumu" keçirilmişdir.

AzərTAc xəbər verir ki, Türkiyənin müxtəlif vilayətlərindən 210 müəllimin qatıldığı forumda ilk dəfə olaraq Azərbaycandan altı nəfərdən ibarət müəllim heyəti iştirak etmişdir.

Tədbirdə Azərbaycan Respublikası Təhsil Nazirliyi "Təhsilin inkişafı üzrə II layihə"nin milli məsləhətçisi, əməkdar müəllim Almaz Həsrət də iştirak etmişdir. O bildirmişdir ki, forum çərçivəsində ikisi (ortaq layihə) Azərbaycandan olmaqla 69 layihə nəzərdən keçirilmiş, iştirakçılara sertifikat və diplomlar təqdim olunmuşdur. Münsiflər heyətində Türkiyənin müxtəlif ali təhsil müəssisələrinin nümayəndələri təmsil olunmuşlar. Qaliblərin Türkiyəni Ortadoğu yenilikçi müəllimlər forumu və Dünya yenilikçi müəllimlər forumunda təmsil edəcəyi gözlənilir.

Tədbirdə Türkiyə Milli Təhsil Nazirliyinin nümayəndələri də iştirak etmişlər.  Forumda, həmçinin Azərbaycandan "İdrak" məktəbinin direktoru Fatmaxanım Bünyadova, Zərifə Əliyeva adına məktəbin müəllimləri Aytən Tahirli, Zemfira Məhəmmədova, Gülxas Aslanova və əməkdar müəllim Mətanət Əhmədova da iştirak etmişlər.