Azərbaycan  təhsil sistemində öz uğurları ilə hər zaman fərqlənən Bakı Avrasiya Universitetinin  20 ili tamam oldu. Yubiley ərəfəsində silsilə tədbirlər, elmi-praktik konfranslara start verən Bakı Avrasiya Universitetinin bir qrup əməkdaşı, professor-müəllimi təhsil naziri Misir Mərdanovun  əmri ilə fəxri fərmanlar və "Azərbaycan Respublikası qabaqcıl təhsil işçisi" döş nişanları ilə mükafatlandırıldı. Mükafatların  təqdim  edilməsində iştirak edən Təhsil Nazirliyinin Aparat rəhbəri İlham Pirməmmədov və baş mütəxəssisi İlyar Vahabov  universitetin müəllim, professor  və tələbələri qarşısında çıxış edərək Bakı Avrasiya Universitetinin keçdiyi şərəfli 20 illik tarixindən danışdılar, bu təhsil ocağına uğurlar dilədilər. İ.Pirməmmədov  çıxışında qeyd etdi ki, təhsilin keyfiyyəti, fəaliyyətin düzgün qurulması, sağlam iş şəraitinin yaradılması universitet rəhbərliyindən birbaşa asılıdır. Bakı Avrasiya Universiteti həm keçmişi, həm də bu günü ilə ölkəmizdə adı hörmətlə çəkilən,  nüfuz qazanan  universitetlər arasında  birincilər sırasındadır.

Daha sonra İlham Pirməmmədov universitetin rektoru, professor Nazim Hüseynlini, professor-müəllim heyətini və tələbələri ali təhsil müəssisəsinin 20 illik yubileyi münasibəti ilə təhsil naziri Misir Mərdanovun və  nazirliyin bütün kollektivi adından təbrik etdi. Universitetin mükafatlara layiq görülmüş professor və müəllim heyətinə uğurlar arzuladı.

Qeyd edək ki, təhsil naziri Misir Mərdanovun  əmri ilə universitetin 7 əməkdaşı "Azərbaycan Respublikası qabaqcıl təhsil işçisi" döş nişanına, 14 nəfər isə  fəxri fərmanlara  layiq görülüb.

ƏDALƏT