|
 Professor
Fəhəm Paşa oğlu Kəsəmənlinin 80 yaşı tamam oldu
Rusiya Federasiyasının Sankt-Peterburq Dövlət Texniki
Universitetinin professoru, fizika-riyaziyyat elmləri
doktoru FƏHƏM PAŞA oğlu KƏSƏMƏNLİYƏ
Əziz və hörmətli Fəhəm müəllim!
Azərbaycan Respublikasının Təhsil Nazirliyi, ölkəmizin
bütün təhsil işçiləri və şəxsən öz adımdan Sizi - Sankt-Peterburq
azərbaycanlılarının ağsaqqalını, elmi uğurları ilə
millətimizə şərəf gətirən Azərbaycan ziyalısını anadan
olmağınızın 80 illiyi münasibətilə səmimi-qəlbdən
təbrik edir, dərin hörmət və ehtiramımızı bildirir, ən
xoş arzularımızı yetirirəm!
Müstəqil Azərbaycanın təhsil işçiləri və ziyalıları
mənalı və şərəfli həyat yolunuzun bu xoş günündə Sizin
Vətəndən uzaqda elm və təhsilin inkişafı,
yarımkeçiricilər fizikası sahəsində ardıcıl, gərgin,
səmərəli elmi-pedaqoji və ixtiraçılıq fəaliyyətinizi
yüksək qiymətləndirir, millətinizə şərəf gətirən elmi
uğurlarınızı ürəkdən alqışlayırlar!
Əziz və hörmətli Fəhəm müəllim!
Biz Sizi həyatının mənasını elmin, təhsilin inkişafına
həsr etmiş aydın zəkalı şəxsiyyət, Azərbaycanın adını
hər zaman uca tutan, millətimizin dünyada tanıdılması
yolunda böyük əmək sərf edən, milli mədəniyyətimizi
digər millətlərə tanıdan, qəlbi Vətən və millət eşqi ilə
döyünən vətənpərvər ziyalı kimi tanıyır və dərin hörmət
bəsləyirik.
Sevindirici haldır ki, Siz bacarıqlı elm və təhsil
təşkilatçısı, tanınmış ixtiraçı olmaqla yanaşı, bir sıra
xarici ölkələrin akademiyalarının üzvü, Rusiyanın bir
çox fəxri adlarının daşıyıcısı, Sankt-Peterburqda
fəaliyyət göstərən "Azərbaycanın mədəni irsi" ictimai
birliyinin əsas təşkilatçılarından biri kimi milli
mədəniyyətimizin dünyada tanıdılması yolunda müstəsna
xidmətlər göstərir, Rusiyada elm, təhsil və mədəniyyətin
inkişafına öz layiqli töhfələrinizi verirsiniz.
İftixar etməli haldır ki, Sizin elm və təhsil
sahəsindəki səmərəli fəaliyyətiniz istər beynəlxalq,
istərsə də Rusiyada dövlət səviyyəsində hər zaman
yüksək qiymətləndirilmiş, "RF-nin ali peşə təhsili fəxri
işçisi", "Əməkdar professor" fəxri adlarına layiq
görülmüş, Beynəlxalq Ali Məktəb Elmləri Akademiyasının
həqiqi üzvü seçilmişsiniz.
Əziz və hörmətli Fəhəm müəllim!
Şərəfli ziyalı ömrünüzün 80-ci ildönümü münasibətilə
Sizi bir daha ürəkdən təbrik edir, Sizə möhkəm
cansağlığı, elmi-pedaqoji və ictimai fəaliyyətinizdə
yeni-yeni uğurlar arzulayıram!
Hörmətlə,
Misir MƏRDANOV,
Azərbaycan Respublikasının təhsil naziri
Bakı şəhəri, 05 iyul 2012-ci il
Bir neçə söz
 Dünyanın
harasında yaşamasından və işləməsindən asılı olmayaraq
hər bir ləyaqətli Azərbaycan oğlu Vətənimizin təmsilçisi,
fəxrimiz, qürurumuzdur. Bu şərəfli soydaşlarımız xüsusən
elm və təhsil adamı olduqda həmkar kimi onları özümüzə
daha doğma, daha əziz sayırıq. Azərbaycanımızın adını
uzaq Sankt-Peterburqda ucaldan, öz əməlləri ilə
millətimizə qarşı başqa xalqlarda da hörmət yaradan,
ümumən alim və müəllim adına şərəf gətirən
yurddaşlarımızdan biri də Rusiya Federasiyasının ali
peşə təhsili fəxri işçisi, Sankt-Peterburq Dövlət
Texniki Universiteti (SPb. Dövlət Politexnik İnstitutu,
SPb. Dövlət Politexnik Universiteti) fizika-riyaziyyat
fakültəsi təcrübi fizika kafedrasının professoru, fizika-riyaziyyat
elmləri doktoru Fəhəm bəy Kəsəmənlidir. Fizika və
texnika sahəsində mürəkkəb almazabənzər yarımkeçiricilər,
fizika tarixi, təhsil problemləri, nobelşünaslıq, eləcə
də Sankt-Peterburq (Petroqrad, Peterburq, Leninqrad)
şəhərlərində yaşamış azərbaycanlıların həyat və
fəaliyyəti haqqında yazdığı dəyərli elmi əsərləri ilə
məşhurlaşmış görkəmli alimin bu il 80 yaşı tamam olur.
Dörd qardaşın ikincisi
Fəhəm bəy Paşa bəy oğlu Kəsəmənli
Azərbaycanın əski bəylərinin nəslindəndir (əlbəttə,
sovet dövründə bəy mənşəyini gizlətməyə məcburdu).
Doğrudur, o, 1932-ci ildə Gəncə şəhərində doğulmuşdu,
ancaq atası - Paşa bəy Mahmud bəy oğlu Kəsəmənli
(1903-1978) Ağstafanın Qıraq Kəsəmən kəndindəndi.
Paşa bəy Kəsəmənli 1926-cı ildə Bakı Piyada Hərbi
Məktəbini bitirərək 1934-cü ilədək orduda xidmət etmiş,
hərbi qulluğunu başa vurduqdan sonra Azərbaycan Kənd
Təsərrüfatı İnstitutunun baytarlıq fakültəsini bitirmiş,
əvvəl Gəncədə, müharibədən sonra isə Bakıda baytar
həkimi işləmişdi. O, müharibə illərində cəbhədə
vuruşmuşdu. Öz sahəsinin bacarıqlı ustası olan Paşa bəy
"Azərbaycan SSR-in əməkdar baytarı" adına və Dövlət
mükafatlarına layiq görülmüşdü.
 Fəhəm
bəyin anası Ruhiyyə Məhəmmədəli qızı Kəsəmənli
(qızlıq soyadı Cəfərova) (1909-1972) də
savadlı bir qadındı; o, Qazax şəhərində doğulmuş, tibb
məktəbini bitirmişdi.
Ailədə dörd oğuldan ikincisi olan Fəhəm bəy 1939-cu ildə
məktəbdə oxumağa başlayır. 1942-ci ilin payızında o,
ailəsi ilə birlikdə Qazax şəhərinə, 1944-cü ildə isə
Bakıya köçür. 1949-cu ildə orta məktəbi bitirərək
Azərbaycan Dövlət Universitetinin (indiki Bakı Dövlət
Universitetinin) fizika-riyaziyyat fakültəsinin fizika
şöbəsinə daxil olur.
Məktəbdə müəllim, institutda laborant
O, ali təhsil almaqla yanaşı, 1952-ci ilin payızından
Bakının Sabunçu qəsəbəsindəki 58 saylı axşam məktəbində
fizika və riyaziyyat müəllimi işləməyə başlayır. 1954-cü
ilin avqustundan Azərbaycan EA Fizika və Riyaziyyat
İnstitutunun istilik fizikası laboratoriyasında baş
laborant vəzifəsində çalışmağa başlayan tələbə
F.Kəsəmənli həmin laboratoriyada diplom işini yerinə
yetirir, 1955-ci ilin mayında həmin diplom işini "əla"
qiymətlə müdafiə edir, universiteti yetkin bir fizik
kimi bitirir.
1956-cı ildə Fizika və Riyaziyyat İnstitutunda kiçik
elmi işçi vəzifəsinə götürülən F.Kəsəmənli həmin il elm
tariximizə ilk imzasını atır - institutun "Əsərlər"ində
onun diplom işinin bir bölümü olan ilk elmi məqaləsi
nəşr edilir.
Aspirant, elmlər namizədi
Fəhəm bəy 1957-ci ilin noyabrında Azərbaycan EA-nın
aspiranturasına daxil olur. Namizədlik imtahanlarını
verdikdən sonra professor D.N.Nasledovun
laboratoriyasında dissertasiya işini yerinə yetirmək
üçün 1959-cu ildə o, Leninqrad Fizika-Texnika
İnstitutuna (LFTİ) göndərilir. Bu institutda çalışdığı 3
ildə yarımkeçiricilərlə bağlı araşdırmalar aparır və
burada yerinə yetirdiyi işlər əsasında 1962-ci ilin
iyununda Azərbaycan Dövlət Universitetində uğurla
namizədlik dissertasiyası müdafiə edir.
 Müdafiəsindən
az sonra elmi işini davam etdirmək üçün o, yenidən
Leninqrad Fizika-Texnika İinstitutuna göndərilir və
kiçik fasilələrlə 1969-cu ilədək orada binar
almazabənzər yarımkeçiricilər üzərində araşdırmalar
aparır.
F.Kəsəmənli 1964-cü ilin sentyabrından 1965-ci ilin
mayınadək Leninqrad Politexnik İnstitutunun təcrübi
fizika kafedrasında assistent işləyir. 1965-ci ildə onun
elmi rəhbərliyi ilə yerinə yetirilmiş yarımkeçiricilər
fizikası üzrə birinci dissertasiya uğurla müdafiə edilir
və bundan sonra o, baş elmi işçi olur.
F.Kəsəmənli araşdırdığı yarımkeçiricilərlə bağlı aldığı
nəticələr əsasında 1963-1969-cu illərdə müxtəlif
beynəlxalq, İttifaq və respublika nəşrlərində 30-dan
artıq orijinal məqalə çap etdirir, müxtəlif səviyyəli
konfrans və simpoziumlarda 10-dan artıq hesabatla çıxış
edir. Həmin dövrdə o, N.A.Qoryunova və D.N.Nasledovla
birlikdə beynəlxalq nəşrlərdə iki böyük icmal məqalə çap
etdirir, iki kollektiv monoqrafiya üçün bölmələr yazır.
1967-ci ildə o, yarımkeçiricilər fizikası üzrə IX
Beynəlxalq konfransın (Moskva, MDU, 23-29 iyul 1968)
Proqram Komitəsinin elmi katibi təyin edilir və konfrans
proqramının hazırlanması, konfransın keçirilməsi və
materialların nəşri ilə əlaqədar böyük elmi-təşkilati iş
görür.
Fəhəm bəyin fəaliyyətində 1969-cu ildə yeni bir səhifə
açılır - o, Kirovoqrad vilayətinin Svetlovodsk şəhərində
yerləşən Təmiz Metallar Zavodunun laboratoriya müdiri
təyin edilir. Burada çalışdığı müddətdə
yarımkeçiricilərin xassələrini öyrənməkdə davam edir və
LFTİ-nin əməkdaşları ilə birgə işlər yerinə yetirir.
Elmlər doktoru, professor
Mürəkkəb almazabənzər yarımkeçiricilər üzrə yerinə
yetirdiyi bütün işləri ümumiləşdirərək 1969-1970-ci
illərdə doktorluq dissertasiyası yazan F.Kəsəmənli
1971-ci ilin aprelində Leninqrad Dövlət Pedaqoji
İnstitutunda onu uğurla müdafiə edir, 1972-ci ildə
fizika-riyaziyyat elmləri doktoru alimlik dərəcəsi alır.
LFTİ-də və Təmiz Metallar Zavodunda yerinə yetirdiyi
işlərə görə F.P.Kəsəmənli SSRİ-də mürəkkəb almazabənzər
yarımkeçiricilər fizikası sahəsində tanınmış alimlərdən
biri olur.
1972-ci ildə Kirovoqrad Dövlət Pedaqoji İnstitutunda
fizika kafedrasının professoru seçilən F.Kəsəmənli
1975-ci ilədək bu vəzifədə işləyir. 1974-cü ilin mayında
SSRİ Ali Attestasiya Komissiyası ona professor elmi adı
verir.
Təmiz Metallar Zavodundakı laboratoriyanın üç əməkdaşı
onun elmi rəhbərliyi altında namizədlik dissertasiyası
müdafiə edir. Zavoddakı 40-a yaxın tədqiqatçıya və
qiyabi aspiranta kömək məqsədilə o, "Dissertasiya
üzərində necə işləməli" adlı metodik vəsait hazırlayıb
nəşr etdirir (1980).
F.Kəsəmənli araşdırdığı yarımkeçiricilər üzrə Payız
Məktəbinin təşkili (2-11 sentyabr 1974), Beynəlxalq
simpoziumun keçirilməsi (9-14 dekabr 1974) ilə əlaqədar
əsas təşkilati işləri həyata keçirir.
SPb. Dövlət Politexnik Universitetində
1975-ci ilin iyunundan Fəhəm bəyin həyatında ən mühüm
mərhələ - Leninqrad Politexnik İnstitutu (LPİ) dönəmi
başlayır (bu məktəbin tarixi adı Sankt-Peterburq Dövlət
Texniki Universitetidir; indi SPb. Dövlət Politexnik
Universiteti də adlandırılır). O, institutun fizika-mexanika
fakültəsinin təcrübi fizika kafedrasına professor
seçilir və bugünədək həmin vəzifədə çalışır. Burada o,
ümumi fizikanın tam kursu üzrə mühazirələr oxuyur,
təcrübi və laboratoriya məşğələləri aparır, 10 il Dövlət
İmtahan Komissiyasının işində iştirak edir. F.P.Kəsəmənli
Təmiz Metallar Zavodundakı tələbələri ilə əməkdaşlığı da
davam etdirərək yarımkeçiricilər fizikası sahəsində fəal
tədqiqatlar aparır, təhsil problemləri, elmi-təşkilati
və elmi-metodik işlərlə də ciddi məşğul olur.
1976-cı ildə o, "Tələbə və elmi-texniki tərəqqi"
Ümumittifaq olimpiadasının II (şəhər) turunun fizika
üzrə münsiflər heyətinin sədri seçilir, 1990-cı ilədək
hər il bu sahədə olimpiadaların təşkilinə böyük əmək
sərf edir və əməyi yüksək dəyərləndirilir.
"SSRİ ixtiraçısı"
Təmiz Metallar Zavodunda istehsalata tətbiq edilən
ixtiraları böyük iqtisadi səmərə verirdi. Bunu demək
yetər ki, bu səmərə təkcə 1979-cu ildə 118 min manat
olmuşdu (bu, o dövr üçün böyük rəqəmdi). 1980-ci ildə "SSRİ
ixtiraçısı" adına layiq görülən Fəhəm bəy həm də LPİ-nin
Elmi-Metodik Şurasının üzvü seçilir və orada 25 il
fəaliyyət göstərir. Həmin il onun 4 elmi-metodik əsəri
nəşr olunur.
Marksizm-Leninizm Universitetində təhsil aldığı
1978-1980-ci illərdə o, buraxılış işi kimi "Texniki ali
məktəblərdə fizika kursunun öyrənilməsində tələbələrin
müstəqil idrak fəaliyyətinin aktivləşdirilməsi yolları"
mövzusunu seçir. Bu mövzunu işləyərkən, o, tələbələrin
müstəqil işinə dair problemin gələcək inkişafının nə
qədər mühüm əhəmiyyəti olduğunu dərk edir. Həmin
zamandan F.Kəsəmənli bu problemlə bağlı müntəzəm
məqalələr çap etdirir və hesabatlarla çıxış edir.
1981-ci ildə o, müəllimlərin ixtisasartırılması
fakültəsinin dinləyiciləri ilə məşğələlər aparmağa
başlayır, onların buraxılış işlərinə rəhbərlik edir,
həmçinin kafedraya təcrübəyə göndərilmiş başqa ali
məktəblərin müəllimlərinə rəhbərlik edir.
Məhsuldar alim
1978-ci ildən 2007-ci ilədək o, müxtəlif səviyyəli 20-dən
çox elmi və elmi-metodik konfransın keçirilməsində
təşkilatçılardan biri kimi fəal iştirak edir.
F.Kəsəmənli 2 kollektiv monoqrafiyanın, 8 tədris-metodik
vəsaitin, 2 ixtiranın, 7 icmal və 100-dən artıq orijinal
elmi, 150 elmi-metodik əsərin, 50-dən artıq
nobelşünaslıq və fizika tarixi üzrə işin həmmüəllifidir.
Onu tez-tez başqa şəhərlərin ali təhsil müəssisələrinə
mühazirələr oxumağa, elmi və elmi-metodik mövzular üzrə
məsləhətlər verməyə dəvət edirlər.
Yüksəkixtisaslı elmi, mühəndis və pedaqoji kadrların
hazırlanmasına böyük əmək sərf edən Fəhəm bəyin
rəhbərliyi altında 6 fizika-riyaziyyat elmləri namizədi,
2 pedaqoji elmlər namizədi yetişib (onlardan 3-ü
sonralar elmlər doktoru olub). O, 4 ixtisaslaşdırılmış
müdafiə şurasının üzvü kimi də gənc alimlərin
yetişdirilməsində yaxından iştirak edib.
Elm tarixçisi
Elm aləminə atıldığı ilk gündən F.Kəsəmənlidə fizika
tarixinə böyük maraq yaranıb. Son illərdə bu maraq
dairəsi bir az da genişlənib. O, bu mövzuda tez-tez
məruzələrlə çıxış edir və elmi məqalələr çap etdirir.
Xüsusilə Leninqrad Politexnik İnstitutu (SPb. Dövlət
Texniki Universiteti, SPb. Dövlət Politexnik
Universiteti) fizika laboratoriyasının yaradıcısı olan
professor B.B.Skobeltsının (2000-ci il) və
təcrübi fizika kafedrasının bütün sabiq rəhbərlərinin:
akademik A.F.İoffe (2000-ci il), professorlar
D.N.Nasledov (1994-cü il), Y.İ.Uxanov (1998,
2000-ci illər) və V.F.Masterovun (1999-cu il)
fəaliyyəti haqqında oçerklər çap etdirir, məruzələrlə
çıxış edir. Təcrübi fizika kafedrasının tarixi haqqında
böyük məqalə çap etdirir (2000-ci il). Onun şəxsi
təşəbbüsü və bilavasitə fəal iştirakı ilə professorlar
D.N.Nasledov (1994-cü il), K.K.Qomoyunov
(1998-ci il) Y.S.Vasilyev (1999-cu il),
B.B.Skobeltsın (2000-ci il) və Y.İ.Uxanovun
(2000-ci il) biobiblioqrafiyaları hazırlanaraq nəşr
etdirilir. Əslində o, SPb. Dövlət Politexnik
Universitetində "Biobiblioqrafik seriya" adlı
nəşrin banilərindəndir. Bu nəşrin gerçək qiymətini hələ
gələcək tarixçilər verəcək.
2001-2006-cı illərdə Fəhəm Kəsəmənli "SPb. DPU-nun Elmi-Texniki
Xəbərləri" jurnalında rusiyalı Nobel mükafatları
laureatları İ.P.Pavlov, İ.İ.Meçnikov, İ.A.Bunin,
N.N.Semyonov, P.A.Çerenkov, İ.M.Frank, İ.E.Tamm,
L.D.Landau, A.M.Proxorov, N.Q.Basov, L.V.Kantoroviç,
P.L.Kapitsa, J.İ.Alfyorov, A.A.Abrikosov, V.L.Ginzburq
və b. haqqında tarixi tərcümeyi-hal oçerkləri nəşr
etdirir. 2003-cü ildə o, Sankt-Peterburqun 300 illiyinə
həsr olunmuş "Elm sahəsində Nobel mükafatı
laureatları olan peterburqlular" adlı kitabını SPb.
DPU-nun prezidenti, Rusiya EA-nın akademiki
Y.S.Vasilyevin ön sözü ilə nəşr etdirir. Bu gün həmin
əsər nadir kitablardan sayılır.
2008 və 2010-cu illərdə onun "SPb. DPU-nun məzunu
olan məşhur fiziklər haqqında oçerklər" və "Təcrübi
fizika kafedrası, onun rəhbərləri və müəllimləri
haqqında oçerklər" adlı kitabları işıq üzü görür. Bu
kitablarda akademiklər A.F.İoffe, D.B.Skobeltsın,
İ.B.Obreimov, P.İ.Lukirski, Y.B.Xariton, A.İ.Şalnikov,
İ.K.Kikoin, B.M.Tuçeviç və b. haqqında tarixi-bioqrafik
oçerklər verilib.
Azərbaycan sevgili araşdırmalar
Rusiyada Azərbaycan ili elan olunmuş 2005-ci ildən
başlayaraq Sankt-Peterburq elm, təhsil və incəsənət
xadimlərinin yaratdığı "Azərbaycanın mədəni irsi"
təşkilatının fəal üzvlərindən olan Fəhəm müəllim
Peterburqda (Petroqradda - Leninqradda - Sankt-Peterburqda)
azərbaycanlıların fəaliyyəti haqqında məlumatların
toplanması, sistemləşdirilməsi, ümumiləşdirilməsi və
yayılması ilə məşğul olmağa başlayır.
Keçən 7 ildə o, tək və ya başqa müəlliflərlə birgə
Peterburqda ("SPb. DPU-nun Elmi-Texniki Xəbərləri", "Peterburqun
tarixi" jurnalları, "Politexnik", "Mütləqiyyət və
pravoslavlıq naminə" qəzetləri), Bakıda ("Dirçəliş"
jurnalı, "Elm" və "Vışka" qəzetləri) və Moskvada ("Azərbaycan
konqresi" qəzeti) rus dilində 15-dən artıq oçerk nəşr
etdirir. Fəhəm bəyin A.M.Artyomovla birgə yazdığı "Peterburq
azərbaycanlıları - Rusiyanın əməkdar xadimləri" adlı
dəyərli kitabı 2008-ci ildə Peterburqun "Leyla"
nəşriyyatında 2 min tirajla nəşr edilir. "Azərbaycanlılar
- Rusiya ordusunun görkəmli hərbi sərkərdələri" adlı
kitabı isə nəşrə hazırlanır.
Hazırda Fəhəm müəllim öz işdaşları ilə birgə "SPb.
DPU fizika-mexanika fakültəsinin məzunları - SSRİ EA (Rusiya
EA) üzvləri" və "Azərbaycanlılar - Sankt-Peterburqun elm,
təhsil, incəsənət və biznes xadimləri" (3-cü
buraxılış) adlı iki bioqrafik məcmuəni nəşrə hazırlayır.
"Azərbaycanlılar Sankt-Peterburqda. Kim kimdir?" və
"Azərbaycanlılar Peterburqda -Petroqradda -
Leninqradda. Ensiklopedik lüğət" adlı kitabları
ortaya qoymaq isə Fəhəm bəyin ən böyük arzusudur.
Əməyi dəyərləndirilir
İşlədiyi ali məktəbin rəhbərliyi və Rusiya Federasiyası
Ali Təhsil Nazirliyi prof. Fəhəm Kəsəmənliyə təhsildə,
elmi-təşkilati, elmi-metodik, elmi, ixtiraçılıq və
ictimai işlərində uğurlarına görə dəfələrlə təşəkkür
elan ediblər. O, "Rusiya Federasiyasının ali peşə
təhsili fəxri işçisi", "Sankt-Peterburq Dövlət
Politexnik Universitetinin əməkdar professoru"
(2002) adlarına layiq görülüb. Beynəlxalq Ali Məktəb
Elmləri Akademiyasının həqiqi üzvü olan Fəhəm müəllimin
70 illiyi ilə əlaqədar 2001-ci ildə "SPb. DTU-nun
görkəmli alimləri" silsiləsindən ona həsr olunmuş
biobiblioqrafik məcmuə nəşr edilmişdi.
Örnək
ailə başçısı
Fəhəm bəy gözəl alim olmaqla yanaşı, həm də örnək olacaq
nümunəvi bir ailə başçısı, nəsil ağsaqqalıdır. Onun iki
oğlu var. Böyük oğlu Mahmud Kəsəmənli Azərbaycan
Dövlət Universitetini bitirib, kimya elmləri namizədidir,
Azərbaycanda yaşayır və işləyir. Mikayıl isə
Leninqrad Politexnik İnstitutunu bitirib, Sankt-Peterburqda
yaşayır. Ali kateqoriyalı fizika müəllimi olan Mikayıl
Kəsəmənli bir çox metodik yazıların, o sıradan "Lan" və
"Spesliteratura" nəşriyyatlarının on min tirajla nəşr
etdiyi "Məktəblinin fizikadan izahlı lüğəti" və
"Fizika. Məktəbli və tələbənin fizikadan izahlı
lüğəti" (Politexnik Universitetin nəşriyyatı, 2007)
dərs vəsaitlərinin müəllifidir. Onun ikinci kitabını
2010-cu ildə Moskvada "Prospekt" və "Knorus"
nəşriyyatları da yüksək tirajla nəşr edib. Təbrik!
Azərbaycan xalqının ləyaqətli oğlu, gözəl alim və
şərəfli insan professor Fəhəm bəy Kəsəmənlini 80 yaşı
münasibətilə ürəkdən təbrik edir, ona bundan sonra da
uzun ömür, möhkəm cansağlığı və gördüyü çox faydalı
işlərdə tükənməz uğur sevincləri arzulayıram!
Ədalət TAHİRZADƏ,
Bakı Avrasiya Universitetinin professoru
[email protected]
Tel.: +994-50-612-68-13 |
