Xaçmaz Rayon Təhsil Şöbəsinin müdiri M.Nurməmmədovadan aldığımız məlumatda bildirilir ki, hazırda rayonda Təhsil Nazirliyinin sifarişi ilə 640 yerlik Köhnə Xaçmaz kənd tam orta məktəbinin, Xaçmaz Rayon İcra Hakimiyyətinin sifarişi ilə rayon təhsil şöbəsinin inzibatı, 480 yerlik Uzunoba və 180 yerlik Müzəffəroba kənd tam orta məktəblərinin binaları tikilir.

32 sinif otağından ibarət olan üçmərtəbəli Köhnə Xaçmaz kənd tam orta məktəbinin binasında son tamamlama işləri görülür. Digər tikilməkdə olan Uzunoba kənd tam orta məktəbinin binası iki mərtəbədən, 24 sinif otağından ibarətdir. Bu binada da son tamamlama işləri gedir. İkimərtəbəli və 9 sinif otağından ibarət Müzəffəroba kənd tam orta məktəbinin birinci mərtəbəsi tikilib qurtarıb. Binada tikinti işləri davam edir.

Bu məktəb binalarının hər birində geniş, işıqlı kitabxana, fizika və kimya laboratoriyaları, kompüter otağı, akt və idman zalları, bufet nəzərdə tutulub.

Rayon təhsil şöbəsinin inzibatı binası isə yaxın vaxtlarda istifadəyə veriləcək.

Köhnə Xaçmaz və Uzunoba kənd tam orta məktəb binalarının sentyabrın   15-dək istifadəyə verilməsi nəzərdə tutulub.

ƏDALƏT