Naxçıvan Dövlət Universitetində fəaliyyət göstərən Cənubi Koreya Mərkəzinə baxış keçirildi. Tədbirdə universitetin rektoru, akademik İsa Həbibbəyli çıxış edərək Cənubi Koreya ilə əlaqələrin inkişafından danışdı. Qeyd olundu ki, müxtəlif vaxtlarda Naxçıvan Dövlət Universitetinin və Cənubi Koreyanın Kyumqsunq Universitetinin nümayəndə heyətlərinin işgüzar görüşləri keçirilmiş, Kimçonq və Busan Kyumqsunq universitetləri ilə qarşılıqlı əməkdaşlıq haqqında muqavilələr imzalanmışdır. Universitetdəki Cənubi Koreya Mərkəzi isə ölkənin tarixini, milli mədəniyyətini, ədəbiyyatını, ali təhsil strukturunu təbliğ edir. Naxçıvan Dövlət Universiteti tərəfindən Koreya Respublikasının KOICA  - qrant yardımı və texniki əməkdaşlıq proqramlarını həyata keçirən dövlət agentliyinə müasir informasiya texnologiyalarının alınması, elektron idarəetmə sisteminin yaradılması ilə bağlı layihə təqdim olunmuşdur. 2013-2015-ci illəri əhatə edəcək layihəyə əsasən Koreyanın KOICA dövlət agentliyi Naxçıvan Dövlət Universitetinə  3 milyon ABŞ dolları həcmində müasir texnoloji avadanlıqlar təqdim edəcək. Cənubi Koreyanın Azərbaycandakı səfirliyi isə universitetə İnternet imkanlarına malik "Samsung" markalı 3D smart televiziyası hədiyyə etmişdir.

Universitetdə Cənubi Koreya Mərkəzi və Dil Hazırlıq Mərkəzi uğurla fəaliyyət göstərir. Sentyabr ayından etibarən mərkəzdə Koreya dili üzrə hazırlıq kurslarına start veriləcək.

Cənubi Koreyanın Azərbaycandakı səfirliyinin nümayəndəsi Lee Hyun Cu, Naxçıvan Dövlət Universitetində təhsil alan koreyalı tələbələr adından çıxış edən  beynəlxalq münasibətlər tarixi və nəzəriyyəsi ixtisaslaşması üzrə II kurs magistr Myungga Yaung və digərləri Cənubi Koreya Mərkəzinin ölkənin tarixi, xalqın milli mədəniyyətinin öyrənilməsi baxımından əhəmiyyətindən danışdılar. 

Sonda Cənubi Koreya Mərkəzinə baxış keçirildi, rektor, akademik İsa Həbibbəyli buradakı xatirə dəftərinə ürək sözlərini yazdı. 

Mehriban SULTAN,
NDU-nun Mətbuat şöbəsinin müdiri