İyulun 20-də Qərb Universiteti öz ənənəsinə sadiq qalaraq növbəti dəfə paytaxtın Xətai İncəsənət Mərkəzində əfsanəvi musiqiçi, görkəmli müğənni, bəstəkar, SSRİ xalq artisti Müslüm Maqomayevin 70 illiyinə həsr olunan anım mərasimi keçirdi.

Mərasimi Azərbaycanın xalq rəssamı, Xətai İncəsənət Mərkəzinin bədii rəhbəri Arif Hüseynov açaraq  bildirdi ki,  bu gün bu qalereyada böyük müğənni, böyük vətəndaş Müslüm Maqomayevin 70 illiyinə gənc rəssamların həsr etdikləri əsərlərinin sərgisini təşkil etmişik. Əsərlər əsasən plakat janrındadır. Müslüm Maqomayev kimi sənətkarlarımızı heç vaxt unutmamalıyıq, onları daim xatırlamalıyıq.

Tədbirdə Qərb Universitetinin  III kurs tələbələrinin rəsm əsərləri, həmçinin Azərbaycan Dövlət Rəssamlıq Akademiyasının reklam işi üzrə dizayn  fakültəsinin tələbəsi Aysel Əlizadənin əl işləri  nümayiş olundu.

Mərasimdə  çıxış edənlər Müslüm Maqomayevin həyat və yaradıcılığı, sənətkarlıq məharəti, müğənnilik istedadı haqqında söhbət açıb, xatirələrini bölüşüb və ürək sözlərini söylədilər.

Tədbirin sonunda  Yevgeni Aşurlinin M.Maqomayevin Bakıdakı həyat və yaradıcılığına həsr etdiyi slayd tamaşaçılara təqdim olundu. 

Leyla MƏMMƏDOVA,
Günay NƏBİYEVA,
BDU-nun jurnalistika fakültəsinin I kurs tələbələri