SAATLI. Rayon təhsil şöbəsinin müdiri Şamil Nurəliyevdən aldığımız məlumatda bildirilir ki, hazırda rayonda Təhsil Nazirliyinin sifarişi ilə 120 şagird yerlik Genişkənd ümumi orta məktəbində, Saatlı Rayon İcra Hakimiyyətinin sifarişi ilə isə 180 yerlik şəhər 2 nömrəli ümumi orta,  80 şagird yerlik Sarıcalı ümumi orta və 300 yerlik şahmat məktəbinin binalarında son tamamlama işləri aparılır.

Yeni tədris ilində istifadəyə veriləcək həmin məktəb binaları müasir tədrisin yüksək səviyyədə təşkili üçün hər cür şəraitlə təmin olunacaq.

Bu məktəb binalarının hər birində geniş kitabxana, kimya və fizika laboratoriyaları, kompüter otağı, fənn kabinetləri, idman zalı, eləcə də mərkəzləşdirilmiş qaydada işləyəcək istilik sistemi quraşdırılması nəzərdə tutulub.

Eyni zamanda rayonun Qıraqlı və Əliabad kəndlərində də 220 və 180 şagird yerlik  müasir  tələblərə cavab verəcək məktəb binaları  inşa edilir. 

GƏDƏBƏY. Bu il Gədəbəy rayonunda  5 yeni məktəb binası istifadəyə veriləcək. Rayon təhsil şöbəsindən aldığımız məlumata görə, bunlar Qoşabulaq kənd 1 nömrəli tam orta, Slavyanka kənd 2 nömrəli tam orta, Arıqdam kənd tam orta, Novo-Saratovka kənd tam orta və Samanlıq kənd tam orta məktəbləridir. Slavyanka kənd 2 nömrəli və Arıqdam kənd tam orta məktəblərinin hər biri üçün 380 şagird yerlik, Qoşabulaq kənd 1 nömrəli tam orta, Novo-Saratovka və Samanlıq kənd tam orta məktəblərinin hər biri üçünsə 220 şagird yerlik yeni binalar inşa olunur.

Hazırda məktəblərin beşində də son tamamlama işləri görülür. Yeni məktəblərin hər birində kompüter otaqları, fənn kabinetləri və laboratoriyaları, idman zalları nəzərdə tutulmuş, mərkəzləşdirilmiş istilik sistemləri yaradılmışdır. Məktəblərin hamısı müasir inventarlarla təmin ediləcəkdir. 

"AZƏRBAYCAN MÜƏLLİMİ"