Ölkəmizin bütün bölgələrində olduğu kimi, Qəbələ rayonunda da təhsil müəssisələrinin maddi-texniki bazasının gücləndirilməsinə ciddi fikir verilir.

RTŞ-dan verilən məlumata görə, hazırda rayonda 5 yeni məktəb inşa olunur. Bunlardan Topbağ və Solquca kəndlərindəki 80, Tövlə kəndindəki 180 şagird yerlik məktəblərdə son tamamlama işləri görülür. Kiçik Pirəlli kəndindəki 180 və Nic qəsəbəsindəki 360 şagird yerlik məktəblərdə isə tikinti-quraşdırma işlərinin yeni dərs ilinədək başa çatdırılması nəzərdə tutulub.

Bunlardan başqa, Bum qəsəbəsində inşa olunan 25 yerlik uşaq bağçasında da işlər başa çatmaq üzrədir.

Rayonun bir sıra məktəblərində isə təmir işləri aparılır. Bunlar Vəndam qəsəbə 1 nömrəli, Qəbələ şəhər 2 və 3 nömrəli məktəblərdir. Vəndam qəsəbə 1 nömrəli məktəbdə hazırda əsaslı təmir işləri davam etdirilir. Qəbələ şəhər 2 və 3 nömrəli məktəblərin isə dam örtüyü və fasad hissəsində təmir-bərpa işləri görülür.

Xatırladaq ki, son 7 ildə Qəbələdə 22 yeni məktəb binası tikilib, 7 məktəb isə əsaslı təmir olunub. 

Yusif ƏLİYEV