Ağsu Rayon Təhsil Şöbəsinin müdiri Tahir Xasıdan
aldığımız məlumatda bildirilir ki, qarşıdakı tədris
ilində V siniflərdə dərs deyəcək fənn müəllimləri üçün
kurikulum üzrə təlim kursları keçirilir. Bu kurslar
kurikulum nəzəriyyəsini mənimsətmək və onu təlimdə
tətbiq etmək üçün müəllimlərə istiqamət verir, onları
yeni üsulla işləməyə hazırlayır. İyul ayının 20-dən
başlanmış təlim kursları rayonda yüksək hazırlıq
şəraitində təşkil olunmuşdur. Bu məqsədlə təlimçilərin
və müdavimlərin ixtiyarına müasir texniki avadanlıqlarla
təchiz olunmuş otaqlar verilmişdir. Təlimçilər Təhsil
Nazirliyi tərəfindən göndərilmiş mütəxəssislərdir.
İlk təlimlər 16 qrupda keçirilir. Artıq riyaziyyat və
fiziki tərbiyə üzrə 4 qrupda iş başa çatdırılmışdır.
Hazırda riyaziyyat və həyat bilgisi üzrə 2 qrupda
məşğələlər aparılır. Sentyabrın 10-dək başa çatdırılması
nəzərdə tutulan bu kurslarda 400-ə yaxın müəllim
təlimatlandırılacaqdır.
Şakir CƏFƏROV |