Avqustun
15-də Naxçıvan şəhərində Texniki Peşə və Sürücülük
Məktəb Kompleksinin açılışı olmuşdur.
Tədbirdə çıxış edən Naxçıvan Muxtar Respublikası Ali
Məclisinin sədri Vasif Talıbov məktəbin yeni binasının
istifadəyə verilməsi münasibətilə kollektivi təbrik
etmişdir. Ali Məclisin sədri demişdir ki, ulu öndər
Heydər Əliyevin siyasi xətti ölkəmizdə iqtisadiyyatın
bütün sahələrinin sürətli inkişafını şərtləndirmişdir.
Bu siyasətin uğurla davam etdirilməsi ölkəmizin iqtisadi
gücünü artırmaqla yanaşı, təhsil sahəsində də kompleks
inkişafa səbəb olmuşdur. Naxçıvan Texniki Peşə və
Sürücülük Məktəbinin yeni binasının istifadəyə verilməsi
də əldə olunan iqtisadi inkişafın və həyata keçirilən
uğurlu islahatların daha bir göstəricisidir.
Ali Məclisin sədri bildirmişdir ki, bu gün ölkəmizin
iqtisadiyyatı inkişaf edir, əhalinin rifah halı
yüksəlir. İqtisadi imkanların genişlənməsi insanların
yüksək həyat standartı şəraitində yaşamalarına imkan
yaradır. Əhali fərdi minik avtomobillərindən istifadəyə
daha çox üstünlük verir. Bununla yanaşı, təsərrüfatın
müxtəlif sahələrində sürücülərə və digər texniki peşə
sahiblərinə də tələbat artır. Bütün bu amillər nəzərə
alınaraq 2010-cu ildə Naxçıvan Avtomobil Məktəbinin
bazasında Naxçıvan Texniki Peşə və Sürücülük Məktəbi
yaradılmışdır. Qısa müddət ərzində məktəbi 3 min 600
müdavim bitirmişdir. Onlardan 390 nəfəri qadın olmuşdur.
Bu gün məktəbdə 510 müdavim təhsil alır. Onların
arasında qadın və qızlardan ibarət qruplar da vardır.
Ali
Məclisin sədri demişdir ki, Naxçıvan Texniki Peşə və
Sürücülük Məktəbi ölkəmizdə yüksək şəraitə və
maddi-texniki təchizata malik olan yeganə məktəbdir.
Məktəbdə dörd elektron lövhəli sinif, iki metodiki
kabinə, iki avtotrenajor sinfi yaradılmışdır. Bütün
sinif otaqları lazımi avadanlıqla təchiz edilmişdir.
Yaradılan şərait məktəbdə təhsil alan müdavimlərin
sürücülük və texniki peşələrə yiyələnmələrinə, yol
hərəkəti qaydalarını dərindən mənimsəmələrinə imkan
verir. Bu isə gələcəkdə nəqliyyat vasitələrindən düzgün
istifadəyə və yol hərəkətinin təhlükəsizliyinə təminat
verəcəkdir.
Ali Məclisin sədri bildirmişdir ki, məktəbdə təhsil alan
müdavimlər dövlətimiz tərəfindən yaradılan şəraitdən
düzgün istifadə etməli, ölkəmiz üçün yararlı mütəxəssis
kimi yetişməlidirlər. Ona görə də məktəbin müdavimləri
peşələrə dərindən yiyələnməli, qarşıya qoyulan tələbləri
düzgün yerinə yetirməlidirlər.
Məktəbin müəllimi Hicran Əliyev yaradılan şəraitə görə
kollektiv adından minnətdarlığını bildirərək demişdir
ki, muxtar respublikamızda peşə təhsilinin inkişafına
hərtərəfli dövlət qayğısı göstərilir. Bu gün müasir
tələblərə cavab verən Texniki Peşə və Sürücülük Məktəb
Kompleksinin istifadəyə verilməsi pedaqoji kollektivin,
burada təhsil alan müdavimlərin böyük sevincinə səbəb
olmuşdur.
Sonra Ali Məclisin sədri binanın açılışını bildirən
lenti kəsmişdir.
Məlumat verilmişdir ki, hazırda məktəbdə hər birində 30
nəfər olmaqla 17 qrup fəaliyyət göstərir. İki mərtəbədən
ibarət olan binada 23 sinif otağı vardır. Sinif
otaqlarında nəzəri dərslərin keçilməsi üçün yüksək
şərait yaradılmış, məlumat stendləri, müxtəlif avtomobil
və kənd təsərrüfatı texnikalarının hissələri
qoyulmuşdur. Bu da keçilən dərslərin praktik olaraq daha
yaxşı mənimsənilməsinə, kənd təsərrüfatı texnikaları
üzrə bacarıqlı mütəxəssislərin hazırlanmasına kömək
edəcəkdir.
Sürücülük peşəsinə yiyələnmək istəyənlər avtotrenajor
siniflərində avtomobillərin idarə olunmasını praktik
olaraq mənimsəyirlər. Biri yük, digəri isə minik maşını
tipli bu avtotrenajorlar ölkəmizdə ilk dəfə olaraq
Naxçıvan Texniki Peşə və Sürücülük Məktəbində tətbiq
olunur. Təlimlərin səmərəli təşkili və müdavimlərin
yüksək səviyyədə hazırlanması gələcəkdə baş verə biləcək
yol-nəqliyyat hadisələrinin ilkin mərhələdə qarşısının
alınması və avtonəqliyyat vasitələrindən düzgün istifadə
baxımından əhəmiyyətlidir.
Binanın ikinci mərtəbəsində metodiki kabinələr, kompüter
otağı, tibbi hazırlıq, yol hərəkəti qaydaları və ümumi
hərbi hazırlıq sinifləri, müəllimlər otağı, elektron
lövhəli siniflər, təlimatçı otağı və arxiv vardır.
Kompüter otağında İnternetə çıxışı olan 18 kompüter
qoyulmuşdur. Hərbi hazırlıq sinfində Azərbaycan
Respublikasının Müdafiə Nazirliyinin hesabına təhsil
alan müdavimlərə ilkin hərbi biliklər tədris
olunacaqdır. Sinif otağında sıra, atəş və mühəndis
hazırlığı qaydalarının əks olunduğu stendlər vardır.
Tibbi hazırlıq otağında isə yol-nəqliyyat hadisələri
zamanı ilkin tibbi yardımın göstərilməsi qaydaları
öyrədiləcəkdir.
AzərTAc |