Böyüməkdə olan gənc nəslin yay istirahətinin mənalı təşkili, onların vətənə məhəbbət, dövlətçilik ruhunda tərbiyəsi istiqamətində Səbail Rayon İcra Hakimiyyəti, Quba Rayon İcra Hakimiyyəti, DİN Daxili Qoşunlar Komandanlığı və "Çağ" Öyrətim İşlətmələri Şirkətinin birgə layihəsi əsasında Qubada təşkil olunan "Şahinlər" hərbi-vətənpərvərlik təmayüllü düşərgədə yeniyetmələrin istirahəti başa çatmışdır.

Səbail rayonunun Qarabağ müharibəsi veteranları və əlillərinin övladları, rayonun aztəminatlı və imkansız ailələrinin uşaqları, həmçinin "SOS-Azərbaycan" uşaq kəndində tərbiyə alan ümumilikdə 250 uşaq üçün Quba şəhərinin ən füsunkar yerində yerləşən Bakı Özəl Türk Liseyinin Quba filialının ərazisində təşkil olunmuş hərbi-vətənpərvərlik təmayüllü "Şahinlər" yay istirahət düşərgəsində 2 həftə ərzində keçən mənalı və yaddaqalan istirahət uşaqların xatirində silinməz izlər buraxmışdır.

Təşkilatçılar tərəfindən xoş  istirahət üçün hər cür şərait yaradılan düşərgədə şagirdləri gələcəkdə hərbi xidmətə layiqincə hazırlamaq məqsədi ilə hərbi-səhra çadırı qurulmuş, səhra mətbəxi yerləşdirilmiş, Azərbaycan xalqının ümummilli lideri Heydər Əliyevə, ölkə başçısı cənab İlham Əliyevə, ölkədəki ordu quruculuğuna, Milli Qəhrəman Mübariz İbrahimova, Daxili Qoşunların fəaliyyətinə, artıq 7-ci dəfədir ki, təşkil olunan "Şahinlər" düşərgəsinin tarixinə həsr olunan stendlər asılmışdır. Düşərgədə məşğələlərin hərbi nizamnaməyə uyğun tərzdə keçirilməsi uşaqların istirahətini daha da maraqlı və unudulmaz etmişdir. 

Yay istirahəti dövründə uşaqların Qubanın görməli yerlərinə, meşələrə, rayonun tarixi guşələrinə gəzintiləri təşkil olunmuş, məktəblilərin təlimləri Daxili Qoşunların Quba şəhərindəki hərbi hissəsində keçmiş, burada onlar hərbi hissənin şəxsi heyətinin xidməti, yaşayış şəraiti, silah və texnikası ilə yaxından tanış olmuş, xüsusi təyinatlı bölüyün məşqlərinə qatılmışlar.

Düşərgədə məktəblilərə Vətənimizin, xalqımızın tarixindən bəhs edən dərslər, müxtəlif mövzularda məşğələlər, maraqlı görüşlər keçirilmiş, filmlər nümayiş etdirilmişdir. Qarabağ savaşında təcrübəli kəşfiyyatçı kimi iştirak edərək bir sıra qəhrəmanlıqlar göstərmiş İbad Hüseynov və hərbi jurnalist Şəmistan Əlizamanlı ilə keçirilən görüş xüsusilə yaddaqalan olmuşdur.

Düşərgənin bağlanışı ilə əlaqədar keçirilən tədbirdə iştirak edən Səbail Rayon İcra Hakimiyyətinin başçısı Asif Əsgərov, Azərbaycan Respublikasının İnsan Hüquqları üzrə müvəkkili (ombudsman) Elmira Süleymanova, DİN Daxili Qoşunların Qərargah rəisinin birinci müavini, general-mayor Şahin Məmmədov, "Çağ" Öyrətim İşlətmələri Şirkəti İdarə Heyətinin sədri Ənvər Özərən uşaqların istirahəti üçün  burada yaradılmış şəraitlə yaxından tanış olmuş, idman yarışlarında qalib gələn  bir qrup şagirdə xatirə medalları və uşaqlarla aparılan tərbiyəvi işlərdə fərqlənən dəstə rəhbərlərinə və hərbiçilərə qiymətli hədiyyələr təqdim etmişlər.

Daha sonra yeniyetmələr qonaqlar qarşısında hərbi keçid, müxtəlif  hərbi təlimlər və istirahət dövründə öyrəndiklərini nümayiş etdiriblər. Daxili Qoşunların xüsusi təyinatlı dəstəsinin çıxışı maraqla qarşılanıb. Bundan başqa, respublikamızın tanınmış incəsənət xadimləri və Daxili Qoşunların hərbi orkestrinin iştirakı ilə keçirilən bayram konsertində düşərgədə istirahət edən uşaqlar da öz məharətlərini göstəriblər.

Zəngin təəssüratlarla Bakıya qayıdan yeniyetmələr, onların valideynləri bu istirahətin təşkilatçılarına öz minnətdarlıqlarını bildiriblər. 

Samirə KƏRİMOVA