2012-2013-cü dərs ilində V siniflərdə fənlər üzrə yeni təhsil proqramlarının (kurikulumların) tətbiqi ilə əlaqədar müəllimlərin peşəkarlığının artırılması, onların yeni pedaqoji innovasiyaların tətbiq olunması sahəsində lazımi biliklərə yiyələnməsi üçün xüsusi kurslardan keçməsi  və sertifikat alması zəruri olmuşdur.

Bu günlərdə Neftçala RTŞ-ın müdiri Əjdər Kərimovdan aldığımız məlumatda bildirilir ki, rayonda 2012-2013-cü dərs ilində beşinci siniflərdə dərs deyəcək müəllimlərin yeni fənn kurikulumları üzrə təlim kursları iyunun 25-dən başlamışdır. Kurslar əsaslı təmir olunmuş şəhər 1 nömrəli tam orta məktəbdə  keçirilir. Məşğələlər keçirilən otaqlar kompüter, noutbuk, proyektor və digər lazımi avadanlıqlarla  təmin edilib.

Artıq Azərbaycan dili və ədəbiyyat, Azərbaycan tarixi, həyat bilgisi, xarici dil, texnologiya, informatika, təsviri incəsənət, musiqi və fiziki hazırlıq müəllimlərinin təlim kursları başa çatmışdır. 400 nəfər müəllim kurslardan keçərək müxtəlif dərəcəli sertifikatlar almışdır. Hazırda riyaziyyat fənni üzrə təlim kursları davam edir. Sentyabrın 16-da başa çatacaq təlim kurslarında ümumilikdə 425 nəfər fənn müəllimi iştirak edərək sertifikat alacaqdır.