Məlum olduğu kimi, müasir Azərbaycan dövlətinin
qurucusu, ümummilli lider Heydər Əliyev bütün dövrlərdə
təhsilimizin inkişafına və təhsil işçilərinə xüsusi
qayğı və diqqət göstərmiş, müəllimlik peşəsini ən
şərəfli peşə adlandırmışdır.
Bu gün sevindirici haldır ki, ulu öndərin siyasi kursu
möhtərəm Prezidentimiz İlham Əliyev tərəfindən
uğurla davam etdirilir. Ölkə Prezidentinin diqqəti,
qayğısı və yaxından dəstəyi ilə 2003-cü ildən bəri
Azərbaycanın təhsil sistemində çox ciddi islahatlar
həyata keçirilmiş, irimiqyaslı dövlət proqramları qəbul
olunmuş və icra edilmişdir.
Təhsil ocaqlarının maddi-texniki bazasının
möhkəmləndirilməsi, onların yeniləşdirilməsi sahəsində
Heydər Əliyev Fondunun prezidenti, millət vəkili
Mehriban xanım Əliyevanın da xidmətləri böyükdür. Məhz
fondun təşəbbüsü ilə reallaşdırılan "Yeniləşən
Azərbaycana yeni məktəb" proqramı çərçivəsində son illər
yüzlərlə təhsil müəssisəsi əsaslı təmir edilmişdir.
Ölkədə həyata keçirilən bu proqramlara uyğun olaraq
Ağdam rayonunda da təhsil müəssisələrinin maddi-texniki
bazasının möhkəmləndirilməsi sahəsində xeyli işlər
görülmüşdür. O cümlədən, rayonun Səfərli kənd, Şəki,
Çələbixan qəsəbələrində məktəblər tikilib istifadəyə
verilmişdir.
Ağdam Rayon İcra Hakimiyyətinin təşəbbüsü ilə bütün
məktəblərimizin maddi-texniki vəziyyəti araşdırılmış,
əsaslı təmirə ehtiyacı olan məktəblərin siyahısı
dəqiqləşdirilərək əlaqədar təşkilatlara təqdim
edilmişdir. Nəticədə Alıbəyli kənd tam orta məktəbinin
binası əsaslı təmir edilərək yeni dərs ilinə hazır
vəziyyətə gətirilmişdir.
May ayından başlayaraq rayonun Qaradağlı, Hacıturalı və
Çəmənli kənd tam orta məktəblərində aparılan təmir
işləri başa çatdırılmış və onlar yeni avadanlıqlarla
təmin edilmişdir.
Təhsil işçilərimizin uğurları da böyük olmuşdur. Rayon
üzrə müəllimlərimizdən səkkiz nəfər "Əməkdar müəllim"
fəxri adına, yeddi nəfər "Tərəqqi" medalına layiq
görülmüş, altı nəfər isə "Qabaqcıl təhsil işçisi" döş
nişanı ilə təltif edilmişdir.
Rayonda müəllimlərin elmi-nəzəri və peşəkarlıq
səviyyəsinin yüksəldilməsi istiqamətində də ardıcıl iş
aparılaraq fəal təlim metodlarının tətbiqi ilə bağlı
onların iş təcrübəsi öyrənilmiş və fikir mübadiləsi
aparılmışdır. Bu il rayonun 32 nömrəli tam orta
məktəbinin kimya müəllimi Aynur Zülfüqarova "Ən yaxşı
müəllim" müsabiqəsinin qalibi olaraq ölkə Prezidentinin
sərəncamına əsasən 5000 manat məbləğində pul mükafatı
almışdır.
Bütün bunlarla bərabər, "2008-2012-ci illərdə Azərbaycan
Respublikasında təhsil sisteminin
informasiyalaşdırılması üzrə Dövlət Proqramı"
çərçivəsində rayonun pedaqoji heyətinin İKT üzrə
savadlılığının artırılması istiqamətində də təhsil
şöbəsində kompleks tədbirlər həyata keçirilmişdir.
Qeyd etməliyəm ki, 2011-2012-ci tədris ilində rayonun
orta məktəblərini bitirən 849 məzundan 516 -sı Tələbə
Qəbulu üzrə Dövlət Komissiyasına sənəd vermiş və
onlardan 219 nəfəri (sənəd verənlərin 42,4%-i)
respublikanın müxtəlif ali məktəblərinə yüksək balla
qəbul olunmuşdur.
Qazanılan nailiyyətlərə baxmayaraq, Ağdamın təhsil
işçiləri heç də arxayınlaşmır, qarşıdan gələn yeni
dərs ilində daha böyük uğurlar əldə etmək üçün səylə
çalışırlar.
Elmira ŞÜKÜROVA,
Ağdam Rayon Təhsil Şöbəsinin müdiri |