Bu günlərdə Təhsil Problemləri İnstitutu Kurikulum  Mərkəzində "Erkən uşaqlıq dövründə inkişafa dair strategiyaların və modellərin təşviq və hazırlanmasına əlavə yardım və dəstəyin təmin edilməsi" mövzusunda müzakirə keçirilib.

Tədbirdə YUNİSEF-in Mərkəzi və Şərqi Avropa, Müstəqil Dövlətlər Birliyi ölkələri üzrə regional nümayəndəliyinin erkən uşaqlıq dövründə inkişaf üzrə müşaviri Dipa Qrover və ABŞ-ın Yel Universitetinin uşaq inkişafı və sosial siyasət üzrə E.Siqler adına Tədqiqat Mərkəzinin rəhbəri Yan Van Ravens, Təhsil Nazirliyinin Məktəbəqədər təhsil sektorunun müdiri Nərminə Alnağıyeva, YUNİSEF-in İnkişaf və Təhsil Proqramının rəhbəri Kənan Məmmədli, Təhsil Problemləri İnstitutu Kurikulum Mərkəzinin Məktəbəqədər təhsilin kurikulumu şöbəsinin müdiri Laləzar Cəfərova və başqaları iştirak ediblər.

Müzakirəni Təhsil Nazirliyinin Məktəbəqədər təhsil sektorunun müdiri Nərminə Alnağıyeva giriş sözü ilə açaraq tədbirin olduqca aktual bir mövzuya həsr olunduğunu deyib. Respublikamızda məktəbəqədər təhsil sahəsində görülən işlər barədə geniş danışan N.Alnağıyeva  beynəlxalq təşkilatların təmsilçilərinin iştirak etdiyi bugünkü müzakirənin əhəmiyyətini xüsusi vurğulayıb.

Sonra Kurikulum Mərkəzinin şöbə müdiri Laləzar Cəfərova "Azərbaycan Respublikasında məktəbəqədər təhsilin proqramı (kurikulumu)" sənədinin xarakterik cəhətlərindən ətraflı söz açıb. 

Tədbirin sonunda iştirakçılar tərəfindən mövzu ilə bağlı geniş diskussiya və fikir mübadiləsi aparılıb.    

Samirə KƏRİMOVA