Müəllim... Bütün  zamanların ən şərəfli, müqəddəs peşələrindən sayılıb.  Bu sözün işığı, ziyası, nuru hər birimizin ürəyinə həmişə bir rahatlıq gətirib, ruhuna öz şöləsi ilə işıq salıb. Bu müqəddəs peşə sahibləri uşaqlara, fidan balalara ilk hərfi, ilk rəqəmi öyrədərək onları gələcək həyata hazırlayırlar. Bakıdakı 54 nömrəli tam orta məktəbin müəllimi, peşəsini sevən, uşaqlarla işləməkdən zövq alan Rəna Seyidova da belə ziyalılarımızdandır.

R.Seyidova Gədəbəyin İsalı kəndində doğulub. Uşaqlara sevgi, qayğı, həssas münasibət, tükənməz sevgi onu pedaqoji universitetin ibtidai təhsilin pedaqogikası və metodikası fakültəsinə gətirib. Nümunəvi, öncül tələbə kimi ad çıxarıb, müəllim və tələbə yoldaşlarının sevimlisinə çevrilib. Əsl ziyalı xanıma xas keyfiyyətləri özünə cəmləşdirən Rəna Seyidova az keçməmiş fəaliyyətə başladığı 54 nömrəli məktəbdə də həm kollektivin, həm də uşaqların və valideynlərinin əzizi olub, onların rəğbətini və hörmətini qazanıb. 37 illik pedaqoji təcrübə müddətində bir gün də olsun tələbkarlıq, nümunəvilik, işinə məsuliyyət, yenilik, daim axtarışda olmaq hissləri onu tərk etməyib. Bu müddət ərzində o, hər bir şagirdini doğma balası kimi əzizləyərək onlara ömründən nur paylayıb addım-addım. Bölüşdürdükcə bitməyən ziyasından hər bir şagirdinə bir pay verib. Bir müəllim, ziyalı üçün bundan böyük xoşbəxtlik yoxdur əslində. Vaxt keçəcək, bu günün birinciləri -  Ərhan, Nadir, Hüseyn, Jalə, Ayxan, Cavid, Məhəmməd, Sübhan, Elgün məktəbi bitirəcək və bəlkə də çox şeyləri unudacaqlar. Amma unuda bilməyəcəkləri bircə müəllim olacaq. Onlara qələm tutmağı öyrədən Rəna müəllim.