Son illər təhsilimizdə aparılan islahatlardan, tətbiq olunan yeniliklərdən biri də ölkəmizdə müəllimlərin mərkəzləşdirilmiş qaydada, müsabiqə yolu ilə işə qəbuludur. Artıq üçüncü ildir ki, keçirilən müsabiqə nəticəsində hər il yüzlərlə müəllim ölkəmizin bütün bölgələrində təhsil müəssisələrində sevib-seçdiyi peşə üzrə işləmək imkanı qazanır. Bu il işə yeni qəbul olunan müəllimlərdən biri də mənəm.

1987-ci il iyulun 23-də Mingəçevir şəhərində anadan olmuşam. 2005-ci ildə orta məktəbi bitirib, Bakı Dövlət Universitetinin fizika fakültəsinə daxil olmuşam. 2009-cu ildə universiteti bitirib hərbi xidmətə yollanmışam. 2010-cu ildə hərbi xidmətdən qayıtdıqdan sonra təyinatım üzrə Gədəbəy rayonunun Hacılar kəndində fizika müəllimi işləmişəm. Ailə vəziyyətimlə əlaqədar işdən çıxıb paytaxta gəlməli oldum. Amma pedaqoji fəaliyyətimi davam etdirmək istəyirdim. Ona görə də Təhsil Nazirliyinin bu il müəllimlərin işə qəbulu ilə bağlı keçirdiyi müsabiqədə iştirak etdim. Müsabiqənin I mərhələsini keçib II mərhələsində - test imtahanında iştirak etmək hüququ qazandım. İmtahan verib 27,13 bal topladım və 13 nömrəli Bakı Peşə Liseyinə işə qəbul olundum.

Müsabiqənin bütün mərhələləri tam şəffaf və yüksək səviyyədə təşkil olunmuşdu. Ölkəmizdə müəllimlərin işə qəbulu üçün tətbiq olunan bu yeniliyi yüksək qiymətləndirir və bu işdə əməyi olanlara minnətdarlıq edirəm.

Hər il olduğu kimi bu il də sentyabrın 15-də "Bilik günü" qeyd olundu. Liseyin müəllim və usta kollektivi başda direktor olmaqla məni səmimi qarşıladılar. Direktor məni kifayət qədər dərs yükü ilə təmin edib. Mənə hətta sinif və fizika kabineti rəhbərliyi də verilib. Ümumiyyətlə, müasir standartlara cavab verən məktəbimiz bütün avadanlıqlarla təchiz olunmuşdur.

Daim inkişaf edən respublikamızda biz gənclərə yaradılan bu şəraitə görə dövlətimizin başçısı cənab İlham Əliyevə bütün gənc müəllimlər adından dərin minnətdarlığımı bildirirəm. 

Anar MUSTAFAYEV,
13 nömrəli Bakı Peşə Liseyinin fizika müəllimi