Sentyabrın 28-də Amerikanın "Beynəlxalq Tədqiqatlar və Mübadilə Şurası"nın (IREX)  Azərbaycan nümayəndəliyinin  təşəbbüsü və xarici mütəxəssislərin  iştirakı ilə təlim keçirilib. Jurnalistika fakültəsində yeni media fənlərini (onlayn jurnalistika, multimedia jurnalistika, sosial media və yeni mediaya giriş) tədris edən  müəllimlər üçün  təşkil edilən təlim  "Azərbaycan yeni media" layihəsi çərçivəsində baş tutub. Böyük Britaniyadan olan mütəxəssis David  Brever və "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz iştirakçılara  yeni media fənlərinin  tədris metodları barədə məlumat veriblər.

Universitetlərin jurnalistika fakültələrinin müəllimləri üçün nəzərdə tutulan təlimdə  BDU-nun jurnalistika fakültəsindən Osman Gündüz, Aynur Kərimova, Könül Niftəliyeva, Aynur Nəsirova və Anzulə Əmirova, Qərb Universitetindən Günel Bilalova, Azərbaycan Universitetindən Lalə Dilanova, Xəzər Universitetindən Cabir Məmmədli, Vəfalı Ənsərov, Naxçıvan Dövlət Universitetindən Seyid Surə, Şəhla Şirəliyeva, Odlar Yurdu Universitetindən İbadət Məmmədov iştirak ediblər.

Qeyd edək ki, IREX beynəlxalq humanitar təşkilat  olaraq 1998-ci ildən Azərbaycanda nümayəndəliyini təsis edib.  Azərbaycanda  təhsilin və medianın  inkişafına dəstək məqsədilə ABŞ Dövlət Departamentinin Təhsil və Mədəniyyət Bürosunun, habelə USAİD-in maliyyələşdirdiyi müxtəlif proqramlar həyata keçirir. 

Y.ƏLİYEV