Bu günlərdə Bolqarıstanda gənc musiqiçilərin "Ümid. İstedadlar. Ustadlar" adlı XVII beynəlxalq müsabiqəsi keçirilib. Professorlar Viktor Çuçkov (Bolqarıstan), Tomislav Baynov (Almaniya) və Tamara Poddubnayadan (ABŞ) ibarət münsiflər heyətinin yekdil qərarı ilə kiçik və orta qruplarda Qran-pri nominasiyasında birinci mükafata Azərbaycan ifaçıları - Bakı Musiqi Akademiyasının məktəb-studiyasının şagirdləri Firuzə Bəylərova və Murad Abbasov layiq görülüblər.

23 ölkədən 150 nəfərin iştirak etdiyi sənət yarışmasında Qran-pri nominasiyasında mükafatlandırılan 15 nəfər arasında  yer alan bu  iki yeniyetmə pianoçu yüksək mükafatla yanaşı, Almaniyada müasir dövrün görkəmli musiqiçilərinin ustad dərslərində iştirak etmək imkanı da qazanıblar.

Qeyd edək ki, Bolqarıstanda  keçirilmiş bundan əvvəlki müsabiqələrdə uğur qazanmış digər laureatlarımız da Almaniyaya səfərlə mükafatlandırılıblar. Həmin laureatlardin biri- Bakı Musiqi Akademiyasının məktəb-studiyasının şagirdi Vüsalə Babayeva bu yaxınlarda Hammelburq Musiqi Akademiyasında müxtəlif ölkələrdən olan iştirakçılarla birlikdə ustad dərsində müvəffəqiyyətlə çıxış edib. 

Samirə KƏRİMOVA